ഞാൻ ഫാത്തിമയാണ്, എന്നെ രാഖി എന്നു വിളിക്കരുത്, ഉംറ വിശേഷങ്ങൾ പങ്കിട്ട് നടി

തന്റെ നഗ്നചിത്രങ്ങൾ വിറ്റതിന് ഭർത്താവ് ആദിൽ ഖാൻ ദുറാനിയ്‌ക്കെതിരെ ആരോപണം ഉന്നയിച്ചതിന് പിന്നാലെ മക്കയിലെത്തി ആദ്യ ഉംറ നിർവഹിച്ച് രാഖി സാവന്ത്. സഹോദരൻ വാഹിദ് അലി ഖാൻ, ഭാര്യ ശായിസ്ത അലി ഖാൻ എന്നിവർക്കൊപ്പമാണ് തീർത്ഥാടനത്തിനായി അവർ മക്കയിലെത്തിയത്. ഉംറയ്ക്കുശേഷം മദീനയിലെത്തി പ്രവാചകന്റെ പള്ളിയും സന്ദർശിച്ചു അവർ.

ഭർത്താവ് ആദിൽ ഖാൻ ദുറാനിയുമായുള്ള പ്രശ്‌നങ്ങൾ തുടരുന്നതിനിടെയാണ് സാവന്ത് സൗദിയിലെത്തുന്നത്. ഉംറയ്ക്കു പുറപ്പെട്ടതു മുതലുള്ള വിവരങ്ങൾ അവർ സോഷ്യൽ മീഡിയയിൽ പങ്കുവയ്ക്കുന്നുണ്ട്. ആദ്യ ഉംറയ്ക്കായി മക്കയിലേക്കു പോകുകയാണെന്നും വലിയ സന്തോഷത്തിലാണെന്നും വിമാനത്തിൽനിന്നുള്ള ഒരു വിഡിയോയിൽ അവർ പറഞ്ഞു. വലിയ ഭാഗ്യവതിയാണ് താനെന്നും മക്കയിലെത്തിയാൽ എല്ലാവർക്കു വേണ്ടിയും പ്രാർത്ഥിക്കുമെന്നും അവർ വിഡിയോയിൽ പറഞ്ഞു. എല്ലാവരുടെയും പ്രാർത്ഥന ആവശ്യപ്പെടുകയും ചെയ്തു.

രാഖി സാവന്തിനെതിരെ പത്രസമ്മേളനത്തിൽ ആദിൽ ഖാൻ നിരവധി ആരോപണങ്ങൾ ഉന്നയിച്ചിട്ടുണ്ട്. തന്റെ നഗ്നചിത്രങ്ങൾ ഭർത്താവ് ആദിൽ ദുബായിൽ വിറ്റതായി രാഖി സാവന്തും ആരോപിച്ചു. ഭർത്താവ് ആദിൽ ഖാൻ ദുറാനിയുമായുള്ള വിവാഹത്തെ തുടർന്നാണ് രാഖി സാവന്ത് ഇസ്ലാം മതം സ്വീകരിച്ചത്. രാഖി സാവന്ത് കഴിഞ്ഞ വർഷമാണ് ആദിലിനെ വിവാഹം ചെയ്യുന്നത്. രാഖിക്ക് 41 വയസും ആദിലിനു 30 വയസുമാണ് പ്രായം. തന്റെ അമ്മയുടെ മരണത്തിന് കാരണക്കാരൻ ഭർത്താവാണെന്നും നടി നേരത്തെ ആരോപിച്ചിരുന്നു. എന്നാൽ കേസ് പരിഗണിക്കുന്നത് കോടതി തിങ്കളാഴ്ചത്തേക്ക് മാറ്റി. പ്രതിഭാഗത്തിന് വേണ്ടി അഭിഭാഷകൻ ഹാജരാകാതിരുന്നതിനെ തുടർന്നാണ് കോടതി കേസ് മാറ്റി വെക്കുന്നത്.