രാമനാട്ടുകര സംഭവം; കൊടുവള്ളി സംഘത്തിൽ നിന്നും സ്വർണം തട്ടാൻ എത്തിയ രണ്ടാമത്തെ കാർ കണ്ടെത്തി

കൊടുവള്ളി സംഘത്തിൽ നിന്നും സ്വർണം തട്ടാൻ എത്തിയ രണ്ടാമത്തെ കാർ കണ്ടെത്തി. ചെർപ്പുളശ്ശേരിയിൽ നിന്നുള്ള സംഘം സഞ്ചരിച്ച KL 52N 4045 എന്ന ബെലേനോ കാറാണ് കണ്ടെത്തിയത്. ഈ കാറിൽ സ്വർണക്കടത്ത് – ഗുണ്ടാ സംഘത്തിലെ രണ്ടുപേർ രക്ഷപ്പെട്ടെന്നായിരുന്നു പോലീസ് നിഗമനം

പട്ടാമ്പി വല്ലപ്പുഴയ്ക്ക് സമീപമുള്ള പറമ്പിൽ ഉപേക്ഷിക്കപ്പെട്ട രീതിയിലായിരുന്നു കാർ കണ്ടെടുത്തത്. കാറിൽ നിന്നും ഒരു മൊബൈൽ ഫോണും പൊലീസിന് ലഭിച്ചിട്ടുണ്ട്. കൊണ്ടോട്ടി പോലീസ് എത്തി കാർ കസ്റ്റഡിയിൽ എടുത്തു. ചെർപ്പുളശ്ശേരി സ്വദേശിയുടെ പേരിലുള്ളതാണ് കാർ.

വിമാനത്താവളം വഴി കടത്തിക്കൊണ്ടുവന്ന സ്വർണം വാങ്ങാനെത്തിയ കൊടുവള്ളി സംഘത്തെ ലക്ഷ്യമിട്ടു രണ്ട് കാറുകളിലാണ് ചെർപ്പുളശ്ശേരിയിൽ നിന്നുള്ളവർ കരിപ്പൂരിൽ എത്തിയത്. കൊടുവള്ളി സംഘത്തിന്റെ കയ്യിൽ സ്വർണമുണ്ടെന്ന തെറ്റിദ്ധാരണയിൽ ചേസ് ചെയ്യുന്നതിനിടെയാണ് ഒരു സംഘത്തിന്റെ വാഹനം അപകടത്തിൽപ്പെട്ടത്. അപകടത്തിൽ അഞ്ച് പേർ മരിച്ചിരുന്നു. ഇതോടെയാണ് വൻ സ്വർണക്കടത്തിന്റെ വിവരം പുറത്തറിയുന്നത്.