മത്സര രംഗത്തേക്ക് ഉടനെയില്ല, വാർ‌ത്തകൾ തെറ്റ്- പിഷാരടി

പാലക്കാട് നിയമസഭാ ഉപതെരഞ്ഞെടുപ്പിൽ മത്സരിക്കാനില്ലെന്ന് ചലച്ചിത്രതാരവും കോൺഗ്രസ് സഹയാത്രികനുമായ രമേഷ് പിഷാരടി. തൻ്റെ സ്ഥാനാർഥിത്വവുമായി ബന്ധപ്പെട്ട വാർത്തകൾ ശരിയല്ലെന്നും യുഡിഎഫിനായി പ്രചാരണത്തിനിറങ്ങുമെന്നും രമേഷ് പിഷാരടി ഫേസ്ബുക്കിൽ കുറിച്ചു.

ഫേസ്ബുക്ക് കുറിപ്പിൻ്റെ പൂർണരൂപം

“നിയമസഭ ഉപതെരഞ്ഞെടുപ്പ്…മത്സരരംഗത്തേക്ക് ഉടനെയില്ല…എന്റെ സ്ഥാനാർഥിത്വവുമായി ബന്ധപ്പെട്ടു വരുന്ന വാർത്തകൾ ശരിയല്ല… പാലക്കാട്, വയനാട്, ചേലക്കര… പ്രവർത്തനത്തിനും… പ്രചരണത്തിനും ശക്തമായി UDFന് ഒപ്പമുണ്ടാവും”

പാലക്കാട് എംഎൽഎയും കോൺഗ്രസ് നേതാവുമായ ഷാഫി പറമ്പിൽ വടകരയിൽനിന്ന് ലോക്സഭയിലേക്ക് തെരഞ്ഞെടുക്കപ്പെട്ടതിനെ തുടർന്ന് എംഎൽഎ സ്ഥാനം രാജിവെച്ചതോടെയാണ് പാലക്കാട് ഉപതെരഞ്ഞെടുപ്പിന് വഴിയൊരുങ്ങിയത്. യൂത്ത് കോൺഗ്രസ് സംസ്ഥാന അധ്യക്ഷൻ രാഹുൽ മാങ്കൂട്ടത്തിൽ, മുതിർന്ന നേതാവ് കെ മുരളീധരൻ തുടങ്ങിയവരുടെ പേരുകളാണ് മണ്ഡലത്തിലേക്ക് ഉയരുന്നത്. അതിനിടെയാണ് രമേഷ് പിഷാരടി മത്സരിച്ചേക്കുമെന്ന അഭ്യൂഹം ഉയർന്നത്. അതേസമയം, തൃശൂരിൽ നിന്നേറ്റ തിരിച്ചടിയോടെ മത്സരിക്കാനില്ലെന്ന നിലപാടിലാണ് കെ മുരളീധരൻ. അടുത്ത രണ്ട് വർഷം മത്സരരംഗത്ത് ഉണ്ടാകില്ലെന്നും പ്രചാരണത്തിലടക്കം സജീവമാകുമെന്നുമാണ് കെ മുരളീധരൻ വ്യക്തമാക്കുന്നത്.