വിമാനം അപകടത്തിൽ‌പ്പെട്ട ഉടൻതന്നെ വാതിൽ തുറന്ന് രക്ഷപെട്ടു- രഞ്ജിത്

191 യാത്രക്കാരുമായി ദുബായിൽ നിന്ന് കരിപ്പൂരിലേക്ക് പുറപ്പെട്ട വിമാനം കഴിഞ്ഞ ദിവസമാണ് അപകടത്തിൽപ്പെട്ടത്. 18 പേരാണ് അപകടത്തിൽ മരണപ്പെട്ടത്. വിവിധ ആശുപത്രികളിലായി നിരവധി ആളുകൾ ഇപ്പോഴും ചികിത്സയിൽ കഴിയുന്നുണ്ട്. സാരമായ പരിക്കുകളോടെ കുറച്ചുപേർ രക്ഷപെടുകയും ചെയ്തു. അത്തരത്തിൽ ജീവൻ തിരിച്ചുകിട്ടിയതിന്റെ സന്തോഷത്തിലാണ് രഞ്ജിത്ത്. തായന്നൂർ കുറ്റിയടുക്കത്താണു രഞ്ജിത്തിന്റെ വീട്. ഏക മകൻ രക്ഷപെട്ടതിന്റെ സന്തോഷത്തിലാണ് അമ്മയും. രഞ്ജിത്ത് 3 വർഷം മുൻപാണ് പ്ലമിങ് ജോലിക്കായി ദുബായിലേക്കു പോയത്. കഴിഞ്ഞ ഡിസംബർ 6ന് നാട്ടിലേക്കു വരാൻ തീരുമാനിച്ചിരുന്നു.

ഭാര്യാസഹോദരനായ തുഷാറിന്റെ വിവാഹം ഏപ്രിൽ 26ന് നിശ്ചയിച്ചിരുന്നതിനാൽ യാത്ര അന്നത്തേക്കു മാറ്റി. കോവിഡ് നിയന്ത്രണങ്ങൾ വന്നതോടെ അതും സാധിച്ചില്ല. പിന്നീടാണ് ഇന്നലെ നാട്ടിലെത്തുമെന്നു വീട്ടുകാരെ അറിയിച്ചത്. വീട്ടിൽ അമ്മ മാത്രമാണുള്ളത്. ഭാര്യ തുഷാരയും കു‍‍ഞ്ഞും പത്തനംതിട്ട അടൂരിലെ അവരുടെ വീട്ടിലാണ്. വിമാനം കയറുമ്പോൾ രഞ്ജിത്ത് അമ്മയെ വിളിച്ചിരുന്നു. എന്നാൽ ലാൻഡിങ്ങിനിടെ അപകടം സംഭവിച്ചതു വീട്ടിൽ അറിഞ്ഞില്ല.

ടെലിവിഷൻ തകരാറിലായിരുന്നു. രാവിലെ ഏഴരയോ‍ടെ രഞ്ജിത്ത് കോഴിക്കോട് ബീച്ച്‌ ആശുപത്രിയിൽ നിന്നു വിളിച്ചപ്പോഴാണ് അപകടം നടന്നത് അമ്മ ശ്യാമള അറിയുന്നത്. എന്നാൽ വിവരം അറിഞ്ഞു രാത്രിയിൽ തന്നെ രഞ്ജിത്തിന്റെ സഹോദരി ഭർത്താവും ഓട്ടോഡ്രൈവറുമായ ജയൻ കോഴിക്കോട്ടേക്കു പുറപ്പെട്ടു.

മറ്റു ബന്ധുക്കളും എത്തി. തുടർന്നു ഭാര്യയെ വിവരം അറിയിച്ചു. വിമാനത്തിൽ പിൻഭാഗത്തെ എമർജൻസി വാതിലിനു സമീപത്തായിരുന്നു ര‍ജ്ഞിത്ത് ഇരുന്നത്. അപകടം നടന്ന ഉടൻ വാതിൽ തുറന്നാണു രഞ്ജിത്ത് രക്ഷപ്പെട്ടത്. പരുക്ക് സാരമുള്ളതല്ല