എന്റെ രഞ്ജിയെ ഗണവേഷം ധരിപ്പിച്ച് യാത്രയാക്കൂ… പൊട്ടിക്കരഞ്ഞ് ലിഷ, സങ്കടക്കടലായി രഞ്ജിത്ത് ശ്രീനിവാസന്റെ അന്ത്യയാത്ര

ആലപ്പുഴ: കൊല്ലപ്പെട്ട ബിജെപി നേതാവ് രഞ്ജിത്ത് ശ്രീനിവാസന്റെ മൃതദേഹം ആലപ്പുഴ വലിയഴീക്കലിലെ കുടുംബ വീട്ടില്‍ ഇന്നലെ സംസ്‌കരിച്ചു. രഞ്ജിത്തിന്റെ വീട്ടിലും മറ്റും ഹൃദയഭേദകമായ കാഴ്ചയായിരുന്നു. ഈറനണിയാത്ത ഒരാള്‍ പോലും അവിടുണ്ടായിരുന്നില്ല. ഇന്നലെ വൈകുന്നേരം അഞ്ച് മണിയോടെയാണ് രഞ്ജിത്തിന്റെ ചിതയ്ക്ക് തീ കൊളുത്തിയത്.

രഞ്ജിത്തിന് അന്തിമോപചാരം അര്‍പ്പിക്കാനായി നാട്ടുകാരും ബിജെപി പ്രവര്‍ത്തകരും അടക്കം നിരവധി വലിയഴീക്കലിലെ വീട്ടില്‍ എത്തി. ഭര്‍ത്താവിന്റെ ചേതനയറ്റ ശരീരം കെട്ടിപ്പിടിച്ച് കരഞ്ഞ അഡ്വക്കേറ്റ് ലിഷയെ സമാധാനിപ്പിക്കാന്‍ ഒരാള്‍ക്കും കഴിഞ്ഞില്ല. എന്റെ ഭര്‍ത്താവിനെ ഗണവേഷം അദ്ദേഹത്തിന്റെ ആഗ്രഹപ്രകാരം ധരിപ്പിച്ച് യാത്ര അയക്കണമെന്ന് അലറി കരയുകയായിരുന്നു ലിഷ.

തുടര്‍ന്ന് ‘നമസ്‌തേ സദാ വത്സലേ’ എന്ന ആര്‍എസ്എസ് ഗണഗീതത്തിന്റെ അകമ്പടിയോടെ ആര്‍എസ്എസ് ഗണവേഷത്തിലാണ് രഞ്ജിത്തിനെ ചിതയിലേക്കെടുത്തത്. ഭാര്യയുടേയും , മകളുടേയും, അമ്മയുടേയും കരച്ചില്‍ സങ്കടക്കാഴ്ചയായി. തന്റെ മകനെ കൊലപ്പെടുത്തിയതെങ്ങനെ എന്ന് ‘അമ്മ വിവരിക്കുന്നത് കേട്ട് കണ്ണീരോടെയാണ് പലരും നിന്നത്.

പോസ്റ്റുമോര്‍ട്ടത്തിന് ശേഷം ഇന്നലെ രാവിലെ പത്തരയോടെയാണ് മൃതദേഹം ബന്ധുക്കള്‍ക്ക് കൈമാറിയത്. ആലപ്പുഴ ബാര്‍ അസോസിയേഷന്‍ ഹാളിലായിരുന്നു ആദ്യ പൊതു ദര്‍ശനം. തുടര്‍ന്ന് മൃതദേഹം വെള്ളക്കിണറിലെ കൊലപാതകം നടന്ന വീട്ടിലേക്കെത്തിച്ചു. കേന്ദ്ര ആഭ്യന്തര സഹമന്ത്രി നിത്യാനന്ദ റായി, ബി ജെ പി സംസ്ഥാന അധ്യക്ഷന്‍ കെ.സുരേന്ദ്രന്‍ തുടങ്ങിയവര്‍ അന്തിമോപചാരം അര്‍പ്പിച്ചു.