കഴുത്ത് ഞെരിഞ്ഞാണ് മരണമെന്ന് റിപ്പോർട്ട് ; നയനയുടെ മരണം പുനരന്വേഷിക്കാന്‍ പൊലീസ്

തിരുവനന്തപുരം : യുവസംവിധായക നയന സൂര്യയുടെ മരണം പുനരന്വേഷിച്ചേക്കും. പോസ്റ്റുമോര്‍ട്ടം റിപ്പോര്‍ട്ട് വീണ്ടും പരിശോധിക്കാന്‍ ക്രൈം റെക്കോഡ്സ് ബ്യൂറോ അസിസ്റ്റന്റ് കമ്മിഷണറെ ചുമതലപ്പെടുത്തി. കൊലപാതക സാധ്യതയുണ്ടോയെന്നാണ് വീണ്ടും അന്വേഷിക്കുന്നത്. മരണം നടന്ന് നാല് വര്‍ഷമാകാന്‍ ഒന്നരമാസം മാത്രം ബാക്കി നില്‍ക്കെയാണ് നയനയ്ക്ക് എന്ത് സംഭവിച്ചൂവെന്ന ചോദ്യം ശക്തമാകുന്നത്.

കൊല്ലപ്പെട്ടതാകാമെന്ന സംശയം വര്‍ധിപ്പിക്കുന്ന പോസ്റ്റുമോര്‍ട്ടം റിപ്പോര്‍ട്ട് പുറത്തുവന്നതാണ് അതിന് കാരണം. കഴുത്ത് ഞെരിഞ്ഞതാണ് മരണകാരണമെന്ന് വ്യക്തമാക്കുന്ന റിപ്പോര്‍ട്ടില്‍ കഴുത്തിലും അടിവയറ്റിലും പരുക്കുകളേറ്റെന്ന നിഗമനവും ദുരൂഹത വര്‍ധിപ്പിക്കുന്നുണ്ട്. ഇതുവരെ കേസ് അന്വേഷിച്ചിരുന്ന മ്യൂസിയം പൊലീസ് തെളിയിക്കപ്പെടാത്ത കേസുകളുടെ പട്ടികയിലേക്ക് മാറ്റി അന്വേഷണം അവസാനിപ്പിച്ചിരുന്നു.

രോഗം മൂലമുള്ള മരണമെന്നാണ് പൊലീസിന്റെ ഇതുവരെയുള്ള നിഗമനം. അതിനെ തള്ളുന്നതാണ് പോസ്റ്റുമോര്‍ട്ടം റിപ്പോര്‍ട്ട്. അതിനാലാണ് പോസ്റ്റുമോര്‍ട്ടം റിപ്പോര്‍ട്ട് ഉള്‍പ്പെടെയുള്ള കേസ് ഫയലുകള്‍ പുനപരിശോധിക്കാന്‍ തിരുവനന്തപുരം സിറ്റി പൊലീസ് കമ്മീഷണര്‍ അസിസ്റ്റന്റ് കമ്മീഷണര്‍ ജെ.കെ.ദിനിലിനോട് നിര്‍ദേശിച്ചത്.

മ്യൂസിയം പൊലീസില്‍ നിന്ന് ഫയലുകള്‍ വിളിച്ചുവരുത്തിയ എ.സി.പി പരിശോധന തുടങ്ങി. അന്വേഷണത്തിലോ നിഗമനത്തിലോ വീഴ്ചയുണ്ടെന്ന് കണ്ടാല്‍ പ്രത്യേകസംഘം രൂപീകരിച്ച് കേസ് വീണ്ടും അന്വേഷിക്കും. ഇന്നോ നാളെയോ ഇക്കാര്യത്തില്‍ തീരുമാനമാകും.