അമ്മയുമായി അയല്‍ക്കാരന് ബന്ധമുണ്ടെന്ന സംശയം ; യുവാവിനെ തലയ്ക്കടിച്ച് കൊലപ്പെടുത്തി മകൻ

ഗാസിയാബാദ്: യുവാവ് അയല്‍ക്കാരനെ കമ്പി വടികൊണ്ട് തലയ്ക്കടിച്ച് കൊലപ്പെടുത്തി. ഉത്തര്‍പ്രദേശിലെ സാഹിബബാദ് സ്വദേശി സുരാജി(22)ആണ് അയല്‍ക്കാരനായ രാജ്കുമാറിനെ(25) കൊലപ്പെടുത്തിയത്. പ്രതിയെ പോലീസ് അറസ്റ്റ് ചെയ്തു. സംഭവത്തില്‍ സുരാജിന്റെ മാതാപിതാക്കളെയും പോലീസ് പിടികൂടി. അമ്മയുമായി രാജ്കുമാറിന് രഹസ്യബന്ധമുണ്ടെന്ന പ്രതിയുടെ സംശയമാണ് കൊലപാതകത്തിന് കാരണമായത്.

ശനിയാഴ്ച രാജ്കുമാറിന്റെ വീട്ടിലെത്തിയ പ്രതി, തന്റെ അമ്മയുമായി രഹസ്യബന്ധമുണ്ടോയെന്ന് നേരിട്ട് ചോദിച്ചു. ഇതോടെ ഇരുവരും തമ്മില്‍ തര്‍ക്കമുണ്ടായി. തുടര്‍ന്ന് മടങ്ങിപ്പോയ പ്രതി ഇരുമ്പ് വടിയുമായി തിരികെ എത്തി രാജ്കുമാറിന്റെ തലയ്ക്ക് അടിക്കുകയായിരുന്നു. തുടർന്ന് തലയ്ക്ക് ഗുരുതര പരിക്കേറ്റ രാജ്കുമാറിനെ ബന്ധുക്കൾ ആശുപത്രിയില്‍ പ്രവേശിപ്പിച്ചു.

എന്നാൽ ചികിത്സയിലിരിക്കെ യുവാവ് ഞായറാഴ്ച വൈകിട്ടോടെ മരണപ്പെട്ടു. തുടര്‍ന്നാണ് കൊലക്കുറ്റം ചുമത്തി സുരാജിനെ പോലീസ് പിടികൂടിയത്. സംഭവസമയം സ്ഥലത്തുണ്ടായിരുന്ന സുരാജിന്റെ മാതാപിതാക്കളായ രാജാറാം(46) ഫൂല്‍മതി(45) എന്നിവരും കേസില്‍ പ്രതികളാണ്. രാജ്കുമാറിനെ ആക്രമിക്കാന്‍ പ്രേരിപ്പിച്ചതാണ് മാതാപിതാക്കൾക്കെതിരായ കുറ്റം.