കോടതിയിൽ എൻഐഎ ഉദ്യോഗസ്ഥരുടെ ദൃശ്യങ്ങളെടുത്ത് തീവ്രവാദ കേസിലെ പ്രതികളുടെ ബന്ധുക്കൾ; ഇടപെട്ട് കോടതി

കൊച്ചി. തീവ്രവാദ കേസിലെ പ്രതികളെ കസ്റ്റഡിയിൽ എടുക്കാനെത്തിയ എൻ ഐ എ ഉദ്യോഗസ്ഥരുടെ ചിത്രങ്ങൾ പകർത്തിയ പോപ്പുലർഫ്രണ്ട് പ്രവർത്തകർക്ക് കോടതി താക്കീത് നൽകി. പോപ്പുലർഫ്രണ്ട് നേതാക്കളുടെ ബന്ധുക്കൾ ആണ് കൊച്ചി എൻ ഐ എ കോടതി വളപ്പിൽ എൻ ഐ എ ഉദ്യോഗസ്ഥരുടെ ദൃശ്യങ്ങൾ പകർത്തിയത്. എൻ ഐ എ രാജ്യ വ്യാപകമായി നടത്തിയ റെയ്ഡിൽ കേരളത്തിൽ അറസ്റ്റിലായ 5 പോപ്പുലർ ഫ്രണ്ട് നേതാക്കളുടെ കസ്റ്റഡി അപേക്ഷ പരിഗണിക്കുന്നതിനിടെയാണ് നാടകീയമായ സംഭവം നടക്കുന്നത്.

‘ദുരൂഹസാഹചര്യത്തിൽ ദൃശ്യം പകർത്തിയെന്ന്’ എൻ ഐ എ ഉദ്യോഗസ്ഥർ കോടതിയെ തുടർന്ന് അറിയിക്കുകയായിരുന്നു. ഇത് ഗൗരവമേറിയ വിഷയമാണെന്നും ഇനി കോടതി വളപ്പിൽ ഇക്കാര്യം ആവർത്തിക്കരുതെന്നും കോടതി തുടർന്ന് മുന്നറിയിപ്പ് നൽകി. പോപ്പുലർഫ്രണ്ട് പ്രവർത്തകർ ഉൾപ്പെട്ട തീവ്രവാദ കേസിൽ 5 പേരെ ചോദ്യം ചെയ്യലിനായി മൂന്ന് ദിവസം എൻ ഐ എ കസ്റ്റഡിയിൽ വിട്ടു.

കരമന അഷ്റഫ് മൗലവി, യഹിയ യോയ തങ്ങൾ അബ്ദുൾ സത്താർ, കെ മുഹമ്മദ് അലി. സി ടി സുലൈമാൻ എന്നിവരെയാണ് ചോദ്യം ചെയ്യലിനായി കസ്റ്റഡിയിൽ വിട്ടത്. പ്രതികളുടെ സോഷ്യൽ മീഡിയ അക്കൗണ്ട് പരിശോധനയിൽ ലഭിച്ച വിവരങ്ങളിൽ കൂടുതൽ ചോദ്യം ചെയ്യൽ വേണമെന്ന് എൻ ഐ എ ആവശ്യപെടുകയായിരുന്നു. കേരളത്തിൽ അടക്കം വിവിധ സംസ്ഥാനത്തെ പി എഫ് ഐ നേതാക്കളെ എൻ ഐ എ കൂട്ടത്തോടെ അറസ്റ്റ് ചെയ്തത് സെപ്റ്റംബർ 22 നായിരുന്നു.