അക്ഷതം ചിരിച്ചുകൊണ്ട് കൈപ്പറ്റുന്ന ഗണേഷ് കുമാർ എൽഡിഎഫിന്റെ ഘടകകക്ഷി നേതാവാണ് എന്ന് ഓർമിപ്പിച്ചാൽ നല്ലത്- രശ്മി ആർ നായർ‌

അയോദ്ധ്യയിൽ പൂജിച്ച ‘അക്ഷതം’ കേരള സംസ്ഥാന ഗതാഗത വകുപ്പ് മന്ത്രി ഗണേഷ് കുമാർ കഴിഞ്ഞ ദിവസം ഏറ്റുവാങ്ങിയിരുന്നു. ആർഎസ്എസ് പ്രാന്ത സഹസമ്പർക്ക പ്രമുഖ് സിസി സെൽവനും സംഘവുമാണ് അക്ഷതം വീട്ടിലെത്തി കൈമാറിയത്. അയോധ്യയിൽ പ്രാണപ്രതിഷ്ഠ നടക്കുന്നതിന്റെ ഭാഗമായി പ്രാണപ്രതിഷ്ഠാ മഹാസമ്പർക്ക പരിപാടി നടത്തിവരികയാണ് ആർഎസ്എസ്സും ബിജെപിയും. ഇതിന്റെ ഭാഗമായാണ് സംഘടനാ നേതാക്കൾ ഗണേഷ് കുമാറിനെ സന്ദർശിച്ചത്. വിഷയത്തിൽ കുറിപ്പുമായെത്തിയിരിക്കുകയാണ് രശ്മി ആർ നായർ.

RSS നേതാക്കളുടെ കയ്യിൽ നിന്നും രാമക്ഷേത്ര അക്ഷതം ഒക്കെ ചിരിച്ചുകൊണ്ട് കൈപ്പറ്റുന്ന NSS താലൂക്ക് പ്രസിഡന്റ് ഗണേഷ് കുമാർ LDF ന്റെ ഘടകകക്ഷി നേതാവാണ് എന്നും LDF സർക്കാരിൽ മന്ത്രിയാണ് എന്നും സിപിഎം നേതാക്കൾ ആരെങ്കിലും ഇടയ്ക്കൊക്കെ ഒന്ന് ഓര്മിപ്പിച്ചാൽ നന്നാവും എന്നാണ് രശ്മി സോഷ്യൽ മീഡിയയിൽ കുറിച്ചത്.

എൽഡിഎഫ് മന്ത്രിസഭയിൽ മന്ത്രിയായി ചുമതലയേറ്റെടുത്തതിനു തൊട്ടുപിന്നാലെയാണ് ഗണേഷ് കുമാർ ഈ സന്ദർശനം അനുവദിച്ചതും അക്ഷതം ഏറ്റുവാങ്ങിയതുമെന്നത് ചർച്ചയായിട്ടുണ്ട്. സംസ്ഥാനത്ത് രാമക്ഷേത്ര ഉദ്ഘാടനവുമായി ബന്ധപ്പെട്ട പരിപാടികളിൽ നിന്ന് സിപിഎം നേതാക്കളും അണികളും അകന്നു നിൽക്കുന്നുണ്ട്. അക്ഷതവും രാമക്ഷേത്രത്തിന്റെ ചിത്രവും നൽകിയാണ് മന്ത്രിയെ അയോധ്യയിലേക്ക് ക്ഷണിച്ചത്.