52 ആം വയസ്സിൽ രേവതിയ്ക്ക് പിറന്ന മകൾ, കാർത്തികയുടെ വിവാഹത്തിൽ ശ്രദ്ധ നേടി മഹി

നടി രാധയുടെ മകളും അഭിനേത്രിയുമായ കാർത്തിക നായരുടെ വിവാഹത്തിൽ പങ്കെടുക്കാനായി തിരുവനന്തപുരത്തേക്ക് ഇന്ത്യൻ സിനിമയിൽ എൺപതുകളിലും തൊണ്ണൂറുകളിലും സജീവമായിരുന്ന താരങ്ങളും സൂപ്പർ താരങ്ങളുമെല്ലാം എത്തിയിരുന്നു. വിവാഹത്തിനെത്തിയ നടി രേവതിയുടെയും മകൾ മഹിയുടെയും വീഡിയോയാണ് ശ്രദ്ധ നേടുന്നത്.

വലിയ ആഡംബരങ്ങളൊന്നുമില്ലാതെ പതിവ് പോലെ ബോബ് ചെയ്ത മുടിയും സിംപിൾ സാരിയും ധരിച്ച് നിറ ചിരിയുമായാണ് രേവതി എത്തിയത്. ഒപ്പം രേവതിയുടെ കയ്യിൽ തൂങ്ങി മകൾ മഹിയുമുണ്ടായിരുന്നു. വർഷങ്ങൾക്ക് ശേഷമാണ് മകൾക്കൊപ്പം ഒരു പൊതുപരിപാടിയിൽ രേവതി പ്രത്യക്ഷപ്പെടുന്നത്. അമ്മയെപ്പോലെ തന്നെ സിംപിൾ ലുക്കിലാണ് മഹിയും എത്തിയത്.

ചുവന്ന പട്ടുപാവടയും മുല്ലപ്പൂവും ചൂടി കേരള സ്റ്റൈലിലായിരുന്നു അമ്മയ്ക്കൊപ്പം മഹിയുടെ എൻട്രി. അമ്മയുടെ കൂട്ടുകാരികൾക്കൊപ്പം കഴിഞ്ഞ ദിവസം മുതൽ മഹിയും ആഘോഷിക്കുകയാണ്. സുഹാസിനി അടക്കമുള്ളവർക്കൊപ്പം നിൽക്കുന്ന മ​ഹിയുടെ ചിത്രങ്ങളും കഴിഞ്ഞ ദിവസം വൈറലായിരുന്നു. രേവതിയുടെ എല്ലാമെല്ലാമാണ് മകൾ മഹി.

അൻപതിരണ്ടാം വയസ്സിൽ താൻ ടെസ്റ്റ്യൂബ് സഹായത്തോടെ ഒരു കുഞ്ഞിന് ജന്മം നൽകി എന്ന്, മകൾക്ക് അഞ്ച് വയസ്സുള്ളപ്പോഴാണ് രേവതി വെളിപ്പെടുത്തിത്. പിന്നീട് പല അഭിമുഖങ്ങളിലും മകളെ കുറിച്ച് വാചാലയായിയെങ്കിലും അപൂർവ്വം ചില സന്ദർഭങ്ങളിൽ മാത്രമാണ് രേവതി മകളെ ക്യാമറയ്ക്ക് മുന്നിൽ കാണിച്ചത്.

തുടക്കത്തിൽ രേവതി ഒരു കുഞ്ഞിനെ ദത്ത് എടുത്ത് വളർത്തുന്നു എന്ന രീതിയിലായിരുന്നു വാർത്തകൾ വന്നത്. എന്നാൽ ഞാൻ ദത്ത് എടുത്ത് വളർത്തുന്നതല്ല, ഇതെന്റെ സ്വന്തം ചോരയാണ് എന്ന് വെളിപ്പെടുത്തി രേവതി തന്നെ രംഗത്ത് എത്തുകയായിരുന്നു. 1896 ൽ സുരേഷ് ചന്ദ്രമോഹനെ വിവാഹം ചെയ്ത രേവതി, 2013 ൽ ആ ബന്ധം അവസാനിപ്പിച്ചു. പിന്നീട് ജീവിതത്തിൽ ഒരു പങ്കാളി വേണ്ട എന്ന് തന്നെയായിരുന്നു തീരുമാനം.

‌