ഡബ്ല്യുസിസിയും വിധുവുമായുള്ള പ്രശ്നങ്ങൾ അവസാനിച്ചെന്ന സൂചന നൽകി റിമ കല്ലിങ്കൽ

സിനിമയിലെ സ്ത്രീകളുടെ സംഘടനായയ ഡബ്ല്യുസിസിയിൽ നിന്നും രാജിവെച്ച സംവിധായിക വിധു വിൻസെന്റുമായി കൂടിക്കാഴ്ചയ്ക്കുളള വാതിൽ തുറന്നുവെന്ന് നടി റിമ കല്ലിങ്കൽ. വിധുവിന് വിഷമമുണ്ടെന്ന് മനസിലാക്കിയപ്പോൾ മുതൽ അവരുമായി സംസാരിക്കാനും സഹായിക്കാനും പലരും ശ്രമിച്ചിട്ടുണ്ട്. ഒരു സംഭാഷണത്തിൽ തീരാത്ത പ്രശ്നങ്ങളില്ലെന്നും റിമ പറയുന്നു. ​ഒരു സ്വാകാര്യ മാധ്യമത്തിന് നൽകിയ അഭിമുഖത്തിലാണ് ഇക്കാര്യം വ്യക്തമാക്കിയത്.

റിമയുടെ വാക്കുകൾ ഇങ്ങനെ

ഒരു സംഭാഷണത്തിൽ തീരാത്ത പ്രശ്നങ്ങളില്ല. പരസ്പരം ഒന്നിച്ചിരുന്ന് സംസാരിക്കുന്ന ഊഷ്മളതയും അടുപ്പവുമൊന്നും ഫോണിലൂടെയോ സ്ക്രീനിലൂടെയോ കിട്ടില്ല. അങ്ങനെയൊരു അവസരം ഉണ്ടായിട്ടില്ല എന്നതാണ് ഞങ്ങൾക്കിടയിലുണ്ടായ പ്രശ്നം. വളരെ ചുരുക്കം ആളുകളോടേ നമുക്കൊരു ആത്മബന്ധം തോന്നുകയുളളൂ. അവരെയൊന്നും നമ്മൾ കൈവിട്ട് കളയരുത്. വിധുവുമായി കൂടിക്കാഴ്ചയ്ക്കുളള വാതിൽ തുറന്നിരിക്കുകയാണ്.

നല്ല സുഹൃദ്ബന്ധങ്ങൾ ഒരിക്കലും നഷ്ടപ്പെടില്ല. ബാക്കിയുളളത് എന്തെങ്കിലും പോയിട്ടുണ്ടെങ്കിൽ അത് പോവാനുളളത് തന്നെയായിരിക്കും. ആളുകളെ തിരിച്ചറിയാൻ കഴിഞ്ഞു എന്നുവേണം അത്തരം സന്ദർഭങ്ങളിൽ മനസിലാക്കാൻ. ആരൊക്കെ കൂടെയുണ്ടാവുമെന്ന് മനസിലാക്കാനുളള ടേണിങ് പോയിന്റായിട്ട് ഡബ്ല്യുസിസി വന്നുവെന്ന് വിചാരിക്കാനാണ് എനിക്കിഷ്ടം. പക്ഷേ എന്തൊക്കെ നഷ്ടപ്പെട്ടാലും അതിലും വലിയ കാര്യങ്ങൾ ചെയ്ത് വെച്ചിട്ടായിരിക്കും പോവുന്നതെന്ന് എനിക്കുറപ്പുണ്ട്.

ഡബ്ല്യുസിസി വെറുമൊരു കളക്ടീവ് മാത്രമാണ്. ഞങ്ങൾ സംഘടനാ പ്രവർത്തനം നടത്തിക്കളയും എന്ന് പറഞ്ഞ് വന്നവരല്ല. ഒരു പ്രശ്ന പരിഹാര സെല്ലുമല്ല. പ്രഷർ ​ഗ്രൂപ്പാണ്. ഒരു സ്ത്രീക്കെതിരെ വലിയ പ്രശ്നമുണ്ടായ പശ്ചാത്തലത്തിൽ ബാക്കിയുളള സംഘടനകൾ അതിനോട് പ്രതികരിച്ചത് വളരെ നിർവികാരമായിട്ടാണ്. അവരെ ഒരു ഇരയായിട്ടല്ല, സർവൈവർ ആയിട്ടാണ് കാണേണ്ടത്. ഇതുപോലത്തെ ഒരുപാട് കേസ് ചുറ്റുമുണ്ട്. ഇനിയെങ്കിലും പ്രതികരിക്കണം എന്ന് പറഞ്ഞ് മുന്നോട്ട് വന്ന ​ഗ്രൂപ്പാണ് ഡബ്ല്യുസിസി. ഞങ്ങൾ കളക്ടീവായി നിൽക്കുന്നതിന് ഒരു ലക്ഷ്യമുണ്ട്. തൊഴിലിടങ്ങളിൽ തുല്യമായ നീതിയും അവസരങ്ങളും വേണം. സ്ത്രീകൾക്ക് സുരക്ഷിതമായി ജോലി ചെയ്യാനുളള അന്തരീക്ഷവും വേണം.