കുടുംബം സെക്കൻഡ്‌ഷോക്ക് പോയ സമയം വീട് കുത്തിത്തുറന്ന് മോഷണം , 27 പവൻ കവർന്നു

കൊല്ലം: രാത്രിയിൽ വീട്ടുകാർ സിനിമയ്ക്കു പോയ നേരം വീട്ടിൽ മോഷണം. വീട് കുത്തിത്തുറന്ന് 27 പവൻ കവർന്നു. തേവള്ളി ഗൗരിശിവത്തിൽ അഭിഭാഷകനായ ധീരജ് രവിയുടെ വീട്ടിലാണ് വെള്ളിയാഴ്ച രാത്രി മോഷണം നടന്നത്. ചിന്നക്കടയിലെ തിയേറ്ററിൽ രാത്രി കുടുംബം സെക്കൻഡ്‌ഷോ കാണാൻപോയ സമയത്തായിരുന്നു വീട്ടിൽ കവർച്ച നടന്നത്.

രാത്രി ഒൻപതുമണിയോടെ പുറപ്പെട്ട വീട്ടുകാർ 12.15-ഓടെ തിരികെയെത്തി ബെഡ്‌റൂം പരിശോധിച്ചപ്പോഴാണ് മോഷണവിവരമറിയുന്നത്. പോകുന്നതിനുമുമ്പ്‌ അടച്ചുപൂട്ടിയിരുന്ന ബെഡ്‌റൂം, തുറന്നിട്ടനിലയിലായിരുന്നു. വസ്ത്രങ്ങളും വാരിവലിച്ചിട്ടിരുന്നു. ഇരുമ്പലമാര കുത്തിത്തുറന്ന് ലോക്കറും തകർത്താണ് ആഭരണങ്ങൾ കവർന്നത്.

വീടിന്റെ മുൻവശത്തെയും അടുക്കളയുടെയും കതകുകൾ അടഞ്ഞുതന്നെ കിടന്നിരുന്നതിനാൽ മോഷ്ടാവ് അകത്തുതന്നെയുണ്ടെന്ന് കരുതി വെസ്റ്റ് പോലീസിൽ വിവരമറിയിച്ചു. എന്നാൽ മോഷ്ടാക്കൾ മുകളിലത്തെ നിലയിലെ കതക് കുത്തിത്തുറന്നാണ് വീട്ടിൽ കയറിയത്. സ്ഥിരം മോഷ്ടാക്കൾ നിരീക്ഷണത്തിലാണെന്നും പ്രതിയെ ഉടൻ പിടികൂടുമെന്നും പോലിസ് പ്രതികരിച്ചു. സംഭവസ്ഥലത്ത് ഡോഗ് സ്‌ക്വാഡ്, വിരലടയാള വിദഗ്ധ എന്നിവരെത്തി പരിശോധന നടത്തി.