മകൾ ജനിച്ച സന്തോഷം പങ്കിട്ട് ദൃശ്യത്തിലെ വില്ലൻ

മോഹൻലാൽ ജിത്തു ജോസഫ് കൂട്ടുകെട്ടിലിറങ്ങിയ സൂപ്പർഹിറ്റ് ചിത്രം ദൃശ്യത്തിലൂടെ ശ്രദ്ധേയനായ താരമാണ് റോഷൻ ബഷീർ . ഫർസാനയാണ് ഭാര്യ. മമ്മൂക്കയുടെ അങ്കിളിന്റെ കൊച്ചുമകളാണ് ഫർസാന. ഇപ്പോളിതാ തനിക്കും ഭാര്യ ഫർസാനയ്ക്കും ആദ്യത്തെ കൺമണിയായി മകൾ പിറന്ന സന്തോഷം പങ്കുവച്ചെത്തിയിരിക്കുകയാണ് റോഷൻ ബഷീർ. അയാത് എന്നാണ് മകൾക്ക് പേരു നൽകിയിരിക്കുന്നത്. 2020 ഓഗസ്റ്റിലായിരുന്നു റോഷന്റെയും ഫർസാനയുടെയും വിവാഹം.

പ്ലസ് ടു എന്ന ചിത്രത്തിലൂടെ സിനിമ ലോകത്തേക്ക് കടന്ന് വന്ന റോഷൻ പിന്നീട് ഇന്നാണ് ആ കല്യാണം, ബാങ്കിങ് അവേഴ്‌സ്, റെഡ് വൈൻ തുടങ്ങിയ ചിത്രങ്ങളിലും അഭിനയിച്ചു. തുടർന്നാണ് മോഹൻലാൽ – ജീത്തു ജോസഫ് ചിത്രം ദൃശ്യത്തിലെ വരുൺ എന്ന വില്ലൻ കഥാപാത്രത്തെ അവതരിപ്പിച്ചത്. ദൃശ്യത്തിന്റെ തെലുങ്ക്, തമിഴ് റീമേക്കുകളിലും റോഷൻ അഭിനയിച്ചു. വിജയ് നായകനായ ഭൈരവയിലും താരം അഭിനയിച്ചു.

ദൃശ്യം റിലീസ് ചെയ്ത് വര്‍ഷങ്ങള്‍ ഏറെയായെങ്കിലും പലരും ഇന്നും തന്നെ തിരിച്ചറിയുന്നത് വരുണിലൂടെയാണെന്നും താരം പറഞ്ഞിരുന്നു. അന്നത്തെ ലുക്കില്‍ നിന്നും ഒരുപാട് മാറിയെങ്കിലും ആളുകള്‍ ഇന്നും തിരിച്ചറിയുന്നത് ദൃശ്യത്തിലെ വില്ലനെന്ന് പറഞ്ഞാണ്. തുടക്കത്തില്‍ വില്ലനെ അവതരിപ്പിക്കണോയെന്ന ആശങ്കയുണ്ടായിരുന്നു, കാണുന്നവരെല്ലാം വില്ലന്‍ എന്ന് പറയുമ്പോള്‍ അല്‍പ്പം പേടിയുണ്ടായിരുന്നു ഇപ്പോള്‍ അതൊക്കെ മാറിയെന്ന് റോഷന്‍ വ്യക്തമാക്കിയിരുന്നു