‘ഒന്നാം ഭാഗത്തില്‍ കൊല്ലപ്പെട്ട വരുണ്‍ പ്രഭാകര്‍ എങ്ങനെ ഇതിലുണ്ടാകുമെന്ന് ചിന്തിച്ച് ഞാന്‍ ഇല്ലെന്ന് പറഞ്ഞു; റോഷന്റെ കുറിപ്പ്

ദൃശ്യം 2 മികച്ച അഭിപ്രായങ്ങളുമായി മുന്നേറുമ്പോള്‍ പ്രതികരണവുമായി രംഗത്തെത്തിയിരിക്കുകയാണ് ദൃശ്യം ആദ്യം ഭാഗത്തില്‍ വരുണ്‍ പ്രഭാകര്‍ എന്ന കഥാപാത്രത്തെ അവതരിപ്പിച്ച റോഷന്‍ ബഷീര്‍. ‘ഞാന്‍ കരുതിയത് ഇത് ജോര്‍ജുകുട്ടിയുടേയും കുടുംബത്തിന്റേയും തീര്‍ത്തും വ്യത്യസ്തമായൊരു കഥയായിരിക്കുമെന്നാണ്. ഞാനും ദൃശ്യം 2 ആകാംഷയോടെയാണ് കണ്ടത്. അപ്പോഴാണ് സ്റ്റോറി മേക്കിങ് സ്‌കില്‍ എന്താണെന്ന് ഞാന്‍ തിരിച്ചറിഞ്ഞത്. ആരും സഞ്ചരിക്കാത്ത വഴികളിലൂടെയാണ് സംവിധായകന്‍ സഞ്ചരിച്ചത്. അവസാനം വരെ സീറ്റിന്റെ അറ്റത്ത് നമ്മളെ പിടിച്ചിരുത്തുന്നതായിരുന്നു സിനിമ’ എന്ന് റോഷന്‍ സോഷ്യല്‍മീഡിയയില്‍ കുറിച്ചു.

റോഷന്റെ ഫെയ്സ്ബുക്ക് പോസ്റ്റ്:

‘അങ്ങനെ കാത്തിരിപ്പ് അവസാനിച്ചിരിക്കുകയാണ്. ദൃശ്യത്തിനൊരു രണ്ടാം ഭാഗം എന്ന് വാര്‍ത്ത വന്നത് മുതല്‍ പലരും എന്നോട് ഞാനും സിനിമയില്‍ ഉണ്ടാകുമോ എന്ന് ചോദിച്ചിരുന്നു. ഒന്നാം ഭാഗത്തില്‍ കൊല്ലപ്പെട്ട വരുണ്‍ പ്രഭാകര്‍ എങ്ങനെ ഇതിലുണ്ടാകുമെന്ന് ചിന്തിച്ച് ഇല്ലെന്ന് ഞാന്‍ പറഞ്ഞു. ഇന്നലെ വരെ ഞാന്‍ കരുതിയത് ഇത് ജോര്‍ജുകുട്ടിയുടേയും കുടുംബത്തിന്റേയും തീര്‍ത്തും വ്യത്യസ്തമായൊരു കഥയായിരിക്കുമെന്നാണ്. ഞാനും ദൃശ്യം 2 ആകാംഷയോടെയാണ് കണ്ടത്. അപ്പോഴാണ് സ്റ്റോറി മേക്കിങ് സ്‌കില്‍ എന്താണെന്ന് ഞാന്‍ തിരിച്ചറിഞ്ഞത്. ആരും സഞ്ചരിക്കാത്ത വഴികളിലൂടെയാണ് സംവിധായകന്‍ സഞ്ചരിച്ചത്. അവസാനം വരെ സീറ്റിന്റെ അറ്റത്ത് നമ്മളെ പിടിച്ചിരുത്തുന്നതായിരുന്നു സിനിമ.

ഒരോ ഡയലോഗും അടുത്ത ക്ലൂ ആയതിനാല്‍ കണ്ണും കാതും സ്‌ക്രീനിലേക്ക് ചേര്‍ത്തുവച്ച് നമ്മളിരുന്നു. എല്ലാ പ്രവര്‍ത്തിക്കും ഭാവങ്ങള്‍ക്കും ഫ്രെയിമുകള്‍ക്കും ഒരോ കാരണങ്ങളുണ്ടായിരുന്നു. ഒരു സൂപ്പര്‍ ഹിറ്റ് സിനിമയ്ക്ക് അതേ ഫീലുള്ളൊരു രണ്ടാം ഭാഗം ഒരുക്കുന്നതിനെ ഒറ്റവാക്കു കൊണ്ട് മാത്രമേ വിശേഷിപ്പിക്കാനാവുകയുള്ളൂ, ബ്രില്യന്റ്. അവസാനമായി ഒന്നുകൂടെ, മലയാള സിനിമയിലെ ഏറ്റവും മികച്ച സിനിമകളിലൊന്നില്‍ ഇത്രമേല്‍ പ്രധാനപ്പെട്ടൊരു കഥാപാത്രത്തിന് ജീവന്‍ നല്‍കാന്‍ സാധിച്ചുവെന്നത് വാക്കുകള്‍ കൊണ്ട് വര്‍ണിക്കാന്‍ കഴിയാത്ത അവസ്ഥയാണ്.’