സുപ്രീം കോടതി വിധി നടപ്പാക്കാനെന്ന പേരില്‍ പിണറായി സര്‍ക്കാര്‍ ശബരിമല വിവാദഭൂമിയാക്കിയപ്പോള്‍ ക്ഷേത്ര വരുമാനത്തിലുണ്ടായത് വന്‍ കുറവ്

തിരുവനന്തപുരം: സുപ്രീം കോടതി വിധി നടപ്പാക്കാനെന്ന പേരില്‍ പിണറായി സര്‍ക്കാര്‍ ശബരിമല വിവാദഭൂമിയാക്കിയപ്പോള്‍ ക്ഷേത്ര വരുമാനത്തിലുണ്ടായത് വന്‍ കുറവെന്ന് റിപ്പോര്‍ട്ട്. ഈ വര്‍ഷം 178,75,54,333 രൂപയായിരുന്നു ശബരിമലയില്‍ നിന്നു കിട്ടിയ വരുമാനം. ഇത് മുന്‍ തീര്‍ഥാടന കാലത്തെക്കാള്‍ 98.66 കോടി രൂപയുടെ കുറവാണുണ്ടായത്. കഴിഞ്ഞ സീസണില്‍ വരുമാനം 277,42,02,803 രൂപയായിരുന്നുവെന്ന് ദേവസ്വം അക്കൗണ്ട് ഓഫീസറുടെ റിപ്പോര്‍ട്ടില്‍ പറയുന്നു.

ക്ഷേത്രച്ചിലവുകള്‍ക്കായി മാസംതോറും നടത്തുന്ന ഹ്രസ്വകാല സ്ഥിരനിക്ഷേപത്തിലും 78 കോടി രൂപയുടെ കുറവുണ്ടായിട്ടുണ്ട്. ശബരിമല യുവതീപ്രവേശന വിധിയെ തുടര്‍ന്ന് സര്‍ക്കാര്‍ ശബരിമലയില്‍ നടത്തിയ കടന്നുകയറ്റം, പ്രളയം, വടക്കന്‍ ജില്ലകളിലെ നിപ ബാധ തുടങ്ങിയ വിഷയങ്ങളാണ് വരുമാന കുറവിനെ ബാധിച്ചതെന്നും ദേവസ്വം അക്കൗണ്ട് ഓഫീസറുടെ റിപ്പോര്‍ട്ടില്‍ പറയുന്നു. ഇതിനോട് അനുബന്ധിച്ച് തിരുവതാംകൂര്‍ ദേവസ്വം ബോര്‍ഡിന് കീഴിലുളള മിക്ക ക്ഷേത്രങ്ങളിലെയും വരുമാനത്തില്‍ കുറവുണ്ടായി. ബോര്‍ഡിന് കീഴിലെ 1250 ക്ഷേത്രങ്ങളില്‍ 60 എണ്ണത്തിന് മാത്രമാണ് ചെലവ് നിര്‍വഹിക്കാനുളള വരുമാനം ലഭിച്ചതെന്നും റിപ്പോര്‍ട്ടില്‍ പറയുന്നു.

കഴിഞ്ഞ 20 വര്‍ഷങ്ങളിലധികമായി തീര്‍ഥാടനകാലത്തെ വരവില്‍ നിന്നാണ് ഹ്രസ്വകാല നിക്ഷേപം നടത്തി വന്നത്. കഴിഞ്ഞ തവണ 194 കോടി ഈ കണക്കില്‍ ലഭിച്ച സ്ഥാനത്ത് ഇത്തവണ ഇതുവരെ 116 കോടി മാത്രമാണ് നിക്ഷേപം ലഭിച്ചത്.