സജി ചെറിയാന്‍ ഭരണഘടനയെ അവഹേളിച്ചിട്ടില്ല; പോലീസ് റിപ്പോര്‍ട്ട് പുറത്ത്

തിരുവനന്തപുരം. ഭരണഘടനയെ അവഹേളിച്ചെന്ന കേസില്‍ മുന്‍ മന്ത്രി സജി ചെറിയാനെ കുറ്റവിമുക്തനാക്കിയ പോലീസ് റിപ്പോര്‍ട്ട് പുറത്ത്. സജി ചെറിയാന്‍ ഭരണഘടനനയെ അവഹേളിച്ചിട്ടില്ലെന്നും വിമര്‍ശിക്കുകമാത്രമാണ് ചെയ്തതെന്നും പോലീസ് തിരുവല്ല ഒന്നാം ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു. സജി ചെറിയാന്‍ ഭരണഘടനയെയോ ഭരണഘടനാ ശില്‍പികളെയോ അപമാനിക്കുന്ന തരത്തില്‍ പ്രസ്താവന നടത്തിയിട്ടില്ലെന്നാണ് റിപ്പോര്‍ട്ടില്‍ പറയുന്നുത്.

ബ്രിട്ടീഷുകാര്‍ പറയുന്നതനുസരിച്ച് എഴുതപ്പെട്ട ഭരണഘടന തൊഴിലാളി വര്‍ഗത്തെ ചൂഷണത്തിന് ഇരയാക്കുന്നുവെന്ന വിമര്‍ശനമാണ് സജി ചെറിയാന്‍ ഉയര്‍ത്തിയതെന്നാണ് പോലീസ് കണ്ടെത്തല്‍. അതനുസരിച്ച് സജി ചെറിയാന് അനുകൂലമായിട്ടാണ് റിപ്പോര്‍ട്ട്. നിരവധി സാക്ഷികളെയോ വ്യക്തികളെയും കാണുകയും അവരില്‍ നിന്ന് കേട്ടറിഞ്ഞ കാര്യങ്ങളില്‍ നിന്ന് സജി ചെറിയാന്‍ ഭരണഘടനാ വിരുദ്ധമായ പ്രസ്താവന നടത്തുകയോ ഭരണഘടനാ ശില്‍പികളെ അപമാനിക്കുകയോ ചെയ്തിട്ടില്ല എന്നാണ് പോലീസ് പറയുന്നത്.

അതിനാല്‍ കേസ് അവസാനിപ്പിക്കണമെന്ന് പോലീസ് കോടതിയെ അറിയിച്ചു. ഇതോടെ ഭരണഘടനയെ വിമര്‍ശിക്കുന്നതും ഭറണഘടനയ്ക്ക് വിരുദ്ധമായി സംസാരിക്കുന്നതും രണ്ടാണെന്നാണ് പോലീസ് വ്യക്തമാക്കുന്നത്. കഴിഞ്ഞ ജൂലായ് മൂന്നിനാണ് പൊതു ചടങ്ങിനിടെ ഭരണഘടനയെ വിമര്‍ശിക്കുന്ന തരത്തില്‍ മന്ത്രിയായിരുന്ന സജി ചെറിയാന്‍ സംസാരിച്ചത്.