ഒളിച്ചോടി വിവാഹം കഴിച്ചു, ഇപ്പോള്‍ 20-ാമത് വിവാഹവാര്‍ഷികം ആഘോഷിച്ച് സാജു നവോദയയും പ്രിയതമയും

മലയാളികളുടെ പ്രിയപ്പെട്ട നടനാണ് സാജു നവോദയ. മിമിക്രി വേദിയില്‍ നിന്നുമാണ് അദ്ദേഹം ബിഗ്‌സ്‌ക്രീനില്‍ എത്തുന്നത്. ബിഗ്‌ബോസ് മലയാളം രണ്ടാം സീസണിലെ മത്സരാര്‍ത്ഥിയായിരുന്നു അദ്ദേഹം. ഷോയിലാണ് ഭാര്യ രശ്മിയെ കുറിച്ചും മറ്റു കുടുംബ വിശേഷങ്ങളും സാജു തുറന്ന് പറയുന്നത്. പ്രണയത്തിനൊടുവില്‍ ഒളിച്ചോടി വിവാഹിതരായവരാണ് ഇരുവരും. ഇപ്പോള്‍ തങ്ങളുടെ 20-ാം വിവാഹ വാര്‍ഷികം ആഘോഷിക്കുകയാണ് സാജുവും രശ്മിയും. പ്രിയതമയ്ക്ക് സോഷ്യല്‍ മീഡിയയിലൂടെ ആശംസ അറിയിച്ചിരിക്കുകയാണ് താരം.

ഞങ്ങളുടെ കൊച്ചു ജീവിതം തുടങ്ങിയിട്ട് ഇന്നേക്ക് ഇരുപത് വര്‍ഷം എന്നാണ് പാഷാണം ഷാജി സോഷ്യല്‍ മീഡിയയില്‍ പങ്കുവെച്ച ചിത്രത്തിന് ക്യാപ്ഷനായി നല്‍കിയിരിക്കുന്നത്. ഭാര്യ രശ്മിയെ ചേര്‍ത്ത് പിടിച്ചിട്ടുള്ള ഫോട്ടോയും പങ്കുവെച്ചിരുന്നു. ഇതിന് താഴെ താരദമ്പതിമാര്‍ക്ക് ആശംസകള്‍ അറിയിച്ച് നിരവധി പേരാണ് എത്തിയിരിക്കുന്നത്. എലീന പടിക്കല്‍, വീണ നായര്‍, തുടങ്ങി കൂടുതലായും ബിഗ് ബോസ് രണ്ടാം സീസണില്‍ ഷാജിയ്ക്കൊപ്പം ഉണ്ടായിരുന്ന സഹമത്സരാര്‍ഥികളാണ് ആശംസ അറിയിച്ചിരിക്കുന്നത്. ഞാനിത് വരെ കണ്ടതില്‍ ഏറ്റവും മികച്ച ആളുകള്‍ നിങ്ങളാണ്. അതിരുകളില്ലാതെ എന്നും നിങ്ങള്‍ പരസ്പരം സ്നേഹത്തോടെ നിലനില്‍ക്കട്ടേ. എന്നും അനുഗ്രഹങ്ങള്‍ മാത്രം. ഹാപ്പി ആനിവേഴ്‌സറി അച്ചായി ആന്‍ഡ് എച്ചുച്ചേച്ചി എന്നുമാണ് എലീന പടിക്കലിന്റെ കമന്റ്. പിന്നാലെ വീണ നായരും ആനിവേഴ്സറി വിഷസ് അറിയിച്ച് എത്തിയിരുന്നു.

സാജുവും രശ്മിയും പ്രണയിച്ച് വിവാഹിതരായവരാണ്. വീട്ടുകാരുടെ സമ്മതമില്ലാതിരുന്നതിനാല്‍ വിവാഹത്തിന് എടുക്കേണ്ടി വന്ന സാഹസങ്ങളും രശ്മിയെ ഓട്ടോയില്‍ കടത്തിക്കൊണ്ട് പോയതിനെ കുറിച്ചുമൊക്കെ വിവരിച്ചിരിക്കുകയാണ് സാജു. പ്രണയത്തിലായിരുന്നപ്പോള്‍ തന്നെ വിവാഹം എന്ന ചിന്തയായിരുന്നു ഉണ്ടായിരുന്നതെന്നും രശ്മിയുടെ വീട്ടുകാര്‍ക്ക് സമ്മതമല്ലാതിരുന്നതിനാല്‍ ഒളിച്ചോടി പോകേണ്ടി വരികയായിരുന്നു.-സാജു നേരത്തെ പറഞ്ഞിരുന്നു.

‘വിവാഹം എന്ന് ചിന്തിച്ചപ്പോള്‍ തന്നെ ആദ്യം രശ്മിയുടെ വീട്ടില്‍ പോയി കാര്യങ്ങള്‍ പറഞ്ഞു. അമ്മയോടാണ് പറഞ്ഞത്. കേള്‍ക്കേണ്ട താമസം അമ്മ ചൂലെടുത്തു. നിനക്കൊന്നും എന്റെ മോളെ കെട്ടിച്ച് തരില്ലെന്ന് പറഞ്ഞു. അപ്പുറത്ത് അച്ഛന്‍ നില്‍ക്കുന്നുണ്ടായിരുന്നുവെങ്കിലും ചോദിക്കാന്‍ പോയില്ല. കാരണം അദ്ദേഹത്തിന്റെ കൈയ്യില്‍ ചുറ്റികയുണ്ടായിരുന്നു. പിന്നീട് ഞങ്ങള്‍ തന്നെ ഒളിച്ചോടാന്‍ തീരുമാനിച്ചു. ഓട്ടോറിക്ഷയില്‍ കയറിയാണ് ഒളിച്ചോടിയത്. ഒളിച്ചോട്ടമാണെന്ന് മനസിലായ ഡ്രൈവര്‍ കാശ് പോലും വാങ്ങാതെ കൃത്യ സ്ഥലത്ത് എത്തിച്ചു. കൂട്ടുകാരന്റെ വീട്ടില്‍ തങ്ങിയാണ് രജിസ്റ്റര്‍ വിവാഹം നടന്നത്. വിവാഹശേഷം സംഭവമറിഞ്ഞ വീട്ടുകാര്‍ പരസ്പരം സംസാരിച്ച് പ്രശ്നങ്ങള്‍ ഒത്തുതീര്‍പ്പാക്കി. തിയ്യതി നിശ്ചയിച്ച് വിവാഹം നടത്താമെന്ന് പറഞ്ഞു. രശ്മിയെ കൂട്ടാന്‍ അവളുടെ വീട്ടില്‍ നിന്ന് ഒരുപാട് ആളുകള്‍ വന്നിരുന്നു. ഒളിച്ചോടിപ്പോയ എന്ന കൂട്ടാന്‍ ആരും വന്നില്ല. ഞാന്‍ തന്നെ ബസ് കയറി വീട്ടിലേക്ക് പോവുകയായിരുന്നു. ഇപ്പോള്‍ യാതൊരു പ്രശ്നവുമില്ലാതെ സുഖമായി ജീവിതം മുന്നോട്ട് പോകുന്നു’- സാജു നവോദയ പറഞ്ഞിരുന്നു.