സമ്പത്ത് സി.പി.എം തിരുവനന്തപുരം ജില്ലാ കമ്മറ്റിയില്‍നിന്ന് പുറത്ത്; ഷിജു ഖാന്‍ ഉള്‍പ്പടെ ഒന്‍പത് പുതുമുഖങ്ങള്‍

തിരുവനന്തപുരം: സി.പി.എം തിരുവനന്തപുരം ജില്ലാ കമ്മിറ്റിയിൽ വൻ അഴിച്ചുപണി. തുടരെയുണ്ടായ വിവാദങ്ങൾക്ക് പിന്നാലെയാണ് അഴിച്ചുപണി ഉണ്ടായിരിക്കുന്നത്. ​മുൻ എം.പിയും മന്ത്രി കെ. രാധാകൃഷ്ണന്റെ പ്രൈവറ്റ് സെക്രട്ടറിയുമായ എ. സമ്പത്തിനെ സി.പി.എം തിരുവനന്തപുരം ജില്ലാ കമ്മറ്റിയിൽ നിന്ന് ഒഴിവാക്കിയതാണ് ഇതിൽ ശ്രദ്ധേയമായ മാറ്റം.

അനുപമയുടെ കുട്ടിയെ ആന്ധ്രയിലേക്ക് അനധികൃതമായി ദത്തുനൽകിയ സംഭവത്തിൽ ആരോപണ വിധേയനായ ശിശുക്ഷേമ സമിതി ജനറൽ സെക്രട്ടറി ഷിജു ഖാനെ ജില്ലാ കമ്മിറ്റിയിൽ ഉൾപ്പെടുത്തിയിട്ടുണ്ട്.

സമ്പത്ത് പാർട്ടി പ്രവർത്തനങ്ങളിൽ ശ്രദ്ധ കൊടുക്കുന്നില്ല എന്ന വിമർശനം ജില്ലാ സമ്മേളനത്തിൽ ഉയർന്നിരുന്നു. 46 അംഗങ്ങളുള്ള ജില്ലാകമ്മിറ്റിയിൽ ഒൻപത് പേർ പുതുമുഖങ്ങളാണ്. ഷിജുഖാന് പുറമെ എസ്.എഫ്.ഐ പ്രസിഡന്റ് വി.എ. വിനീഷ്, ഡി.വൈ.എഫ്.ഐ നേതാവ് കെ.പി. പ്രമോഷ്, എസ്.പി ദീപക് എന്നിവരെയും ജില്ലാ കമ്മിറ്റിയിലേക്ക് തിരഞ്ഞെടുക്കപ്പെട്ടിട്ടുണ്ട്. എന്നാൽ എം.എൽ.എ വി.കെ പ്രശാന്തിനെയും തിരുവനന്തപുരം മേയർ ആര്യാ രാജേന്ദ്രനെയും ജില്ലാ കമ്മിറ്റിയിൽ ഉൾപ്പെടുത്തിയിട്ടില്ല.

ശിശുക്ഷേമ സമിതി മുൻ ജനറൽ സെക്രട്ടറിയാണ് എസ്.പി. ദീപക്. പട്ടിണി കാരണം കൈതമുക്കിലെ കുട്ടികൾ മണ്ണുവാരി തിന്നെന്ന പരാമർശത്തെ തുടർന്ന് അന്ന് വഞ്ചിയൂർ ഏരിയ കമ്മിറ്റിയംഗമായിരുന്ന ദീപക്കിനെ പേട്ട ലോക്കൽ കമ്മിറ്റിയിലേക്ക് തരം താഴ്ത്തിയിരുന്നു. അന്ന് സർക്കാർ നിലപാടിനെതിരെ നിന്നിട്ടും ഇത്തവണ ജില്ലാ കമ്മിറ്റിയിലേക്ക് ഉൾപ്പെടുത്തിയെന്നതാണ് ശ്രദ്ധേയം