സഞ്ജിത് കൊലപാതകം; മുഖ്യ പ്രതിയായ ഡിവൈഎഫ്‌ഐ മേഖല സെക്രട്ടറിയുടെ ഭാര്യാ സഹോദരന്‍ പിടിയില്‍

ആര്‍ എസ് എസ് പ്രവര്‍ത്തകന്‍ സഞ്ജിത്തിനെ കൊലപ്പെടുത്തിയ കേസില്‍ മുഖ്യപ്രതി പിടിയിലായി. ഡിവൈഎഫ്‌ഐ കൊഴിഞ്ഞാമ്പാറ മേഖല സെക്രട്ടറിയുടെ ഭാര്യാ സഹോദരനാണ് പിടിയിലായത്. കൊലപാതകത്തിന് ആസൂത്രണം നടത്തിയ സംഘത്തിപ്പെട്ട കൊഴിഞ്ഞാമ്പാറ അത്തിക്കോട് സ്വദേശി മുഹമ്മദ് ഹാറൂണ്‍ ആണ് പിടിയിലായത്. ഇയാള്‍ ഉള്‍പ്പെട്ട സംഘമാണ് സഞ്ജിത്തിനെ കൊലപ്പെടുത്താന്‍ ഗൂഢാലോചന നടത്തിയതെന്നാണ് പോലീസ് നല്‍കുന്ന വിവരം.

കൊലപാതകത്തിന് ശേഷം ഗൂഢാലോചനയില്‍ പങ്കെടുത്തവരും കൊലപാതകത്തില്‍ നേരിട്ട് പങ്കെടുത്തവരെ സഹായിച്ചവരും ഒളിവില്‍ പോയതോടെ പോലീസ് ഇവര്‍ക്കായി ലുക്ക് ഔട്ട് നോട്ടീസ് പുറത്തിറക്കിയിരുന്നു. കേസില്‍ ഇതോടെ പത്ത് പേര്‍ പിടിയിലായി. കൃത്യത്തില്‍ പങ്കെടുത്ത ഒരാള്‍ അടക്കം മൂന്ന് പേര്‍ കൂടി ഇനി പിടിയിലാകാനുണ്ട്.

കേസിലെ മറ്റൊരു പ്രധാനിയായ ഹക്കിമിന് കോടതി നേരത്തെ ജാമ്യം അനുവദിച്ചത് വിവാദം ആയിരുന്നു. കൊലപാതകവുമായി ബന്ധപ്പെട്ട് ഗൂഢാലോചനയില്‍ പങ്കുള്ള പ്രതി ഹക്കിമിന് ജാമ്യം ലഭിച്ചത് പോലീസിന്റെയും പ്രോസിക്യൂഷന്റെയും ഭാഗത്തു വന്നിട്ടുള്ള ഗുരുതരമായ വീഴ്ച്ചയാണെന്ന് ബിജെപി ആരോപിച്ചിരുന്നു .പോലീസും പോപ്പുലര്‍ ഫ്രണ്ടും തമ്മില്‍ ധാരണയുണ്ടെന്നാണ് ബി ജെ പിയുടെ ആരോപണം. കേസന്വേഷണം കേന്ദ്ര ഏജന്‍സിക്കു കൈമാറാന്‍ സംസ്ഥാന സര്‍ക്കാര്‍ തയ്യാറാവണമെന്ന ആവശ്യം ബി ജെ പി ഉയര്‍ത്തുന്നുണ്ട്.

കഴിഞ്ഞ നവംബര്‍ 15 നാണ് ഭാര്യയ്ക്കൊപ്പം ബൈക്കില്‍ സഞ്ചരിക്കവേ, ആര്‍എസ്എസ് തേനാരി മണ്ഡല്‍ ബൗദ്ധിക് പ്രമുഖായിരുന്ന എലപ്പുള്ളി എടുപ്പുകുളം സ്വദേശി സഞ്ജിത്തിനെ പോപ്പുലര്‍ ഫ്രണ്ടുകാര്‍ കൊലപ്പെടുത്തിയത്. ഭാര്യയെ ബലമായി പിടിച്ചു വെച്ച ശേഷമാണ് പ്രതികള്‍ കൊലപാതകം നടത്തിയത്.