ശങ്കു ടി ദാസിൻറെ ആരോഗ്യനില ഗുരുതരമായി തുടരുന്നു, മെഡിക്കൽ ബുള്ളറ്റിൻ

ബിജെപി നേതാവ് ശങ്കു ടി ദാസിൻറെ ആരോഗ്യനില ഗുരുതരമായി തുടരുന്നുവെന്ന് മെഡിക്കൽ ബുള്ളറ്റിൻ. കോഴിക്കോട്ടെ സ്വകാര്യ ആശുപത്രിയിലാണ് ശങ്കു ചികിത്സയിൽ കഴിയുന്നത്. അപകടത്തിൽ ഗുരുതരമായി പരിക്കേറ്റ ശങ്കു ടി ദാസിനെ കരളിൽ രക്തസ്രാവവും, നിയന്ത്രണവിധേയമല്ലാത്ത ബി പി യുമായാണ് ആശുപത്രിയിൽ പ്രവേശിപ്പിച്ചത്. രക്തസമ്മർദ്ദം ഇപ്പോഴും കുറഞ്ഞ നിലയിൽ തുടരുകയാണെന്ന് മെഡിക്കൽ ബുള്ളറ്റിൻ പറയുന്നു.

മെഡിക്കൽ ബുള്ളറ്റിൻ പൂർണരൂപം

റോഡപകടത്തെ തുടർന്ന് കരളിൽ രക്തസ്രാവവും, നിയന്ത്രണവിധേയമല്ലാത്ത ബി പി യുമായി ശങ്കു ടി ദാസിനെ ജൂൺ 24നാണ് ആശുപത്രിയിൽ പ്രവേശിപ്പിച്ചത്. രക്തസ്രാവം തടയുന്നതിനായി ഇന്നലെ അദ്ദേഹത്തെ ആൻജിയോഎംബൊളൈസേഷന് വിധേയനാക്കുകയും ഐ സി യു വിൽ പ്രവേശിപ്പിക്കുകയും ചെയ്തു. ബി പി കുറഞ്ഞ നിലയിൽ തന്നെ തുടരുന്നതിനാൽ അദ്ദേഹത്തിന് ഐനോട്രോപ്പിക് സപ്പോർട്ട് നൽകുകയും ശ്വാസകോശ സംബന്ധമായ ബുദ്ധിമുട്ടുകൾ ഉണ്ടായിരുന്നതിനാൽ ബ്രോങ്കോസ്കോപ്പിക്ക് വിധേയനാക്കുകയും വെന്റിലേറ്റർ സപ്പോർട്ട് തുടരുകയും ചെയ്യുന്നുണ്ട്. ഒന്നിലധികം അവയവങ്ങൾ പ്രവർത്തനരഹിതമായതിന്റെ ലക്ഷണങ്ങൾ കാണിച്ചതിനാലും ബി പി കുറഞ്ഞ സാഹചര്യം ആവർത്തിച്ചതിനാലും സി ടി സ്കാൻ വീണ്ടും ചെയ്യുകയും രക്തസ്രാവം ഇല്ല എന്ന് ഉറപ്പ് വരുത്തുകയും ചെയ്തു.

അവയവങ്ങളുടെ പരാജയ ലക്ഷണം തുടരുന്നതിനാൽ അദ്ദേഹത്തെ തുടർച്ചയായ റിനൽ റീപ്ലേസ്മെന്റ് തെറാപ്പിക്ക് വിധേയനാക്കുന്നുണ്ട്. നിരന്തരമായ ശ്രദ്ധയും പരിചരണവും നൽകിക്കൊണ്ടിരിക്കുമ്പോഴും അദ്ദേഹത്തിന്റെ മെറ്റാബാളിക് പാരാമീറ്ററുകളും, ഹീമോ ഡൈനാമിക്സും സങ്കീർണ്ണമായി തന്നെ തുടരുകയാണ്.