17-ാം വിവാഹ വാര്‍ഷികത്തില്‍ സരിതയ്ക്ക് ജയസൂര്യയോട് പറയാനുള്ളത്

മലയാളികളുടെ പ്രിയ നടന്‍ ജയസൂര്യയുടെയും ഭാര്യ സരിതയുടെയും 17-ാം വിവാഹ വാര്‍ഷികമായിരുന്നു ഇന്നലെ. ഈ അവസരത്തില്‍ സരിതയ്ക്ക് ജയസൂര്യയോട് ഒരേ ഒരു കാര്യമേ പറയാനുണ്ടായിരുന്നൊള്ളൂ. നീയായിരിക്കുന്നതിന് നന്ദി എന്നായിരുന്നു ജയസൂര്യയ്ക്ക് ഒപ്പമുള്ള ചിത്രം സോഷ്യല്‍ മീഡിയകളില്‍ പങ്കുവെച്ച് സരിത കുറിച്ചത്. ഒപ്പം ആശംസകളും നേര്‍ന്നു.

ജയസൂര്യയും സരിതയും തമ്മിലുള്ള വിവാഹം 2004ല്‍ ആണ് നടന്നത്. പ്രണയ വിവാഹമായിരുന്നു. രണ്ട് മക്കളാണ് ദമ്പതികള്‍ക്കുള്ളത്. അദ്വൈത്, വേദ എന്നിങ്ങനെയാണ് മക്കളുടെ പേരുകള്‍. ജയസൂര്യയ്ക്ക് ഒപ്പം അഭിനയത്തില്‍ അദ്വൈതും അരക്കൈ നോക്കിയിട്ടുണ്ട്. അദ്വൈത് സംവിധാനം ചെയ്ത ഹ്രസ്വചിത്രവും ഏറെ ശ്രദ്ധിക്കപ്പെട്ടിരുന്നു.

ഷൂട്ടിംഗ് തിരക്കുകള്‍ ഒഴിയുമ്പോള്‍ യാത്രകള്‍ക്ക് സമയം കണ്ടെത്തുന്ന താരം കൂടിയാണ് ജയസൂര്യ. സരിതയും യാത്രപ്രിയയാണ്. പോയ വര്‍ഷം ഇരുവരും ഒന്നിച്ച് നേപ്പാളിലും സ്വിറ്റ്‌സര്‍ലന്‍ഡിലും യാത്രകള്‍ നടത്തിയരുന്നു. ഇവരുടെ യാത്രയിലെ ചിത്രങ്ങളും വിശേഷങ്ങളുമൊക്കെ സോഷ്യല്‍ മീഡിയയില്‍ പങ്കുവെച്ചിരുന്നു.

കഥാപാത്രത്തിന്റെ പൂര്‍ണതയ്ക്കായി ഏതറ്റം വരെയും പോകാന്‍ തയ്യാറാകുന്ന നടനാണ് ജയസൂര്യ. താരം നായകനായി എത്തിയ വെള്ളം എന്ന ചിത്രം വളരെയധികം ശ്രദ്ധിക്കപ്പെട്ടിട്ടുണ്ട്. കോവിഡ് പ്രതിസന്ധിക്ക് ശേഷം തിയേറ്ററില്‍ എത്തിയ മലയാള ചിത്രമായിരുന്നു വെള്ളം. ചിത്രത്തില്‍ അമിത മദ്യപാനിയായ മുരളി എന്ന കഥാപാത്രത്തെയാണ് ജയസൂര്യ അവതരിപ്പിച്ചിരിക്കുന്നത്. പ്രജേഷ് സെന്‍ ആണ് ചിത്രം സംവിധാനം ചെയ്തിരിക്കുന്നത്.