സ്കൂളിൽ സ്റ്റാഫ് മീറ്റിങ്ങിനിടെ അധ്യാപകർ തമ്മിൽ സംഘർഷം, ഏഴുപേർക്ക് പരിക്ക്

കോഴിക്കോട്. സ്കൂളിൽ സ്റ്റാഫ് മീറ്റിംഗിനിടെ അധ്യാപകർ തമ്മിലുണ്ടായ സംഘർഷത്തിൽ ഏഴു പേർക്ക് പരിക്കേറ്റു. എരവന്നൂർ യു പി സ്കൂളിലാണ് സംഭവം. കുട്ടികളെ മർദ്ദിച്ചതുമായി ബന്ധപ്പെട്ട് സ്കൂളിലെ രണ്ട് അദ്ധ്യപകർക്കെതിരേ പരാതിയുണ്ടായിരുന്നു. ഇതിനെ ചൊല്ലിയുള്ള തർക്കമാണ് സംഘർഷത്തിലെത്തിയത്

സ്കൂളിലെ അദ്ധ്യാപിക സുപ്രീന, സുപ്രീനയുടെ ഭർത്താവ് ഷാജി മറ്റ് അദ്ധ്യാപകരായ പി ഉമ്മർ, വി വീണ, കെ മുഹമ്മദ് ആസിഫ്, അനുപമ, എം കെ ജസ്ല എന്നിവർക്കാണ് പരിക്കേറ്റത്. സുപ്രീനയെയും മകനെയും വീട്ടിലേക്കു കൂട്ടിക്കൊണ്ടുപോകാൻ എത്തിയതായിരുന്നു മറ്റൊരു സ്കൂളിലെ അദ്ധ്യാപകനായ ഷാജി.

സ്റ്റാഫ് കൗൺസിൽ യോഗത്തിൽ അതിക്രമിച്ചുകയറി ഷാജി ആക്രമണം നടത്തിയെന്നായിരുന്നു മറ്റ് അദ്ധ്യാപകരുടെ പരാതി. എന്നാൽ, മറ്റുള്ള അദ്ധ്യാപകർ ചേർന്ന് തങ്ങളെ ആക്രമിച്ചെന്നാണ് സുപ്രീനയും ഷാജിയും പറയുന്നത്. പരിക്കേറ്റ ഏഴു പേരും കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിൽ കഴിയുകയാണ്.