11 സര്‍ജറികള്‍ വരെ അവള്‍ അഭിമുഖീകരിച്ചു, ഒരുപാട് കടമ്പകള്‍ ഇനിയും ബാക്കിയുണ്ട്, ശരണ്യയെ കുറിച്ച് സീമ ജി നായര്‍

നടി ശരണ്യയെ രോഗം വേട്ടയാടിയത് യാതൊരു ദയയും ഇല്ലാതെയാണ്. വേദനകളുടെ ലോകത്ത് നിന്നും ജീവിതത്തിലേക്ക് തിരികെ എത്തിയെന്ന് കരുതിയപ്പോഴാണ് വീണ്ടും ശരണ്യയെ ട്യൂമര്‍ വേട്ടയാടിയത്. പുഞ്ചിരി നിറഞ്ഞ് തുളുമ്പിയിരുന്ന നടിയുടെ മുഖത്ത് സങ്കടത്തിന്റെ കരിനിഴല്‍ വീഴ്ത്തി വീണ്ടും രോഗം എത്തിയപ്പോള്‍ മലയാളികളുടെ ഹൃദയവും ഒന്നു പൊള്ളി.

ബ്രെയിന്‍ ട്യൂമറിന്റെ രൂപത്തില്‍ എത്തിയ വിധിയെ ശരണ്യ ഒരിക്കല്‍ അതിജീവിച്ചതാണ്. ഇനി ഒരിക്കലും ആ രോഗം തനിക്ക് വരില്ല എന്ന് ആശ്വസിച്ച് ഇരിക്കുമ്പോഴാണ് വീണ്ടും വേദനിപ്പിച്ച് രോഗം എത്തിയത്. ശരണ്യയ്ക്ക് രോഗം വീണ്ടും പിടിപെട്ടുവെന്ന വാര്‍ത്ത അമ്മയാണ് ആരാധകരുമായി പങ്കുവെച്ചത്. ഇത് അറിഞ്ഞതോടെ ശരണ്യയ്ക്ക് വേണ്ടിയുള്ള പ്രാര്‍ത്ഥനയിലായിരുന്നു പ്രിയപ്പെട്ടവരും ആരാധകരും.

ശരണ്യയുടെ സര്‍ജറി കഴിഞ്ഞ വിവരം സീമ ജി നയാരാണ് കഴിഞ്ഞ ദിവസം ആരാധകരെയും പ്രിയപ്പെട്ടവരെയും അറിയിച്ചത്. ഇപ്പോള്‍ വീണ്ടും ശരണ്യയെ കാത്തിരിക്കുന്ന പ്രിയപ്പെട്ടവര്‍ക്ക് മുന്നിലേക്ക് പുതിയ വിശേഷവുമായി എത്തുകയാണ് സീമ ജി നായര്‍.

സര്‍ജറി വിജയകരമായിരുന്നെങ്കിലും കടമ്പകള്‍ ഇനിയും കടമ്പകള്‍ ഏറെയുണ്ടെന്ന് സീമ ജി നായര്‍ പറയുന്നു. ‘അവള്‍ പതിയെപതിയെ സുഖമായി വരുന്നു. ഡിസ്ചാര്‍ജ് ചെയ്യുകയാണ്. തുടര്‍ ചികിത്സയുംചെക്കപ്പും ഉള്‍പ്പെടെ ഒരുപാട് കടമ്പകള്‍ ഇനിയും ബാക്കിയുണ്ട്. 11 സര്‍ജറികള്‍ വരെ അവള്‍ അഭിമുഖീകരിച്ചു. ഫിസിയോതെറപ്പി തുടരണം എന്നാണ് ഡോക്ടര്‍മാര്‍ പറഞ്ഞിരിക്കുന്നത്. ശരിക്കും അതിജീവനത്തിന്റെ പ്രതീകമാണ് ശരണ്യ.’ സീമ പറയുന്നു.