ശരണ്യ മരിച്ച വിവരം അമ്മ അറിയുന്നത് ഫോണിലൂടെ, ഷോക്കിൽ നിന്നു മോചിതയായിട്ടില്ല, സീമ ജി നായർ

കഴിഞ്ഞ ദിവസമാണ് നടി ശരണ്യ ശശി അന്തരിച്ചത്. നാളുകളായി അർബുദത്തോട് പടവെട്ടിയായിരുന്നു നടിയുടെ മരണം. ശരണ്യയുടെ വിയോഗവാർത്ത ഞെട്ടലോടെയാണ് ആരാധകർ കേട്ടത്. ശരണ്യയുടെ വിയോഗവാർത്ത എത്തിയത് മുതൽ സീമ ജി നായരെ കുറിച്ചായിരുന്നു ഏവരും ചോദിച്ചത്. ശരണ്യ സഹായിക്കാൻ എപ്പോഴും സീമ ഒപ്പമുണ്ടായിരുന്നു. ശരണ്യയ്ക്ക് സ്‌നേഹ സീമ എന്ന വീട് ഒരുക്കിയത് സീമ ജി നായരും ചേർന്നായിരുന്നു. ശരണ്യയുടെ ആരോഗ്യസ്ഥിതി മോശമായത് അറിഞ്ഞത് മുതൽ സീമയും ആശുപത്രിയിൽ ഒപ്പമുണ്ടായിരുന്നു.

ഇപ്പോളിതാ ശരണ്യയുടെ അമ്മ ഇപ്പോഴും ആ വേദനയിൽ നിന്നും ഞെട്ടലിൽ നിന്നും പുറത്തു കടന്നിട്ടില്ലെന്ന് പറയുകയാണ് സീമ, വാക്കുകൾ, ശരണ്യ മരിക്കുമ്പോൾ അമ്മ ആശുപത്രിയിൽ ഉണ്ടായിരുന്നില്ല. മോൾക്ക് വൈകുന്നേരത്തേക്കുള്ള ഭക്ഷണം കൊണ്ടുവരാൻ രാവിലെ പതിനൊന്നുമണിയോടെ വീട്ടിലേക്ക് പോയതാണ്. അതിനിടെയാണ്, ഒന്നരയോടെ ശരണ്യ മരിച്ചത്. അപ്പോൾ ആശുപത്രിയിലുണ്ടായിരുന്ന ഞങ്ങൾ കുറച്ച് പേർക്ക് മാത്രമേ വിവരം അറിയുമായിരുന്നുള്ളൂ. ആരെങ്കിലും വീട്ടിലേക്ക് പോയി അമ്മയോട് സാവധാനം കാര്യം പറയാം എന്നായിരുന്നു പ്ലാൻ.

പക്ഷേ കാര്യങ്ങൾ മറ്റൊരു വഴിക്കാണ് നീങ്ങിയത്. അതായത്, ശരണ്യ മരിച്ച വിവരം എങ്ങനെയോ ലീക്കായി. അതോടെ സോഷ്യൽ മീഡിയയിൽ പോസ്റ്റുകൾ വന്നു. ശരണ്യയുടെ ഫോൺ അമ്മയുടെ കയ്യിലായിരുന്നു. നെറ്റ് ഓണായിരുന്നതിനാൽ അവയിൽ ചിലതിന്റെ നോട്ടിഫിക്കേഷൻ ഫോണിൽ കാണിച്ചു. അതിൽ ആദരാഞ്ജലികൾക്കൊപ്പം ശരണ്യയുടെ ഫോട്ടോ കണ്ട് അമ്മ ഓപ്പൺ ആക്കി നോക്കിയപ്പോഴാണ് വിവരം അറിഞ്ഞത് – മകൾ മരിച്ചെന്ന്! എങ്ങനെ ഒരു അമ്മയുടെ സമനില തെറ്റാതിരിക്കും. അമ്മയെ വിവരം അറിയിക്കാൻ ആശുപത്രിയിൽ നിന്നു തിരിച്ചവർ പകുതി വഴിയെത്തും മുമ്പേ അമ്മ വിവരം അറിഞ്ഞു. ഇപ്പോഴും അതിന്റെ ഷോക്കിൽ നിന്നു ചേച്ചി മോചിതയായിട്ടില്ല. ഭയങ്കര കരച്ചിലാണ്. കണ്ടു നിൽക്കുക പ്രയാസം. ആർക്കും ആശ്വസിപ്പിക്കാനാകുന്നില്ല. മകളായിരുന്നു ചേച്ചിയുടെ ലോകം. മോൾക്കു വേണ്ടിയായിരുന്നു ആ ജീവിതം