പോര് മുറുകുന്നു, കറുത്ത ബലൂണും, ടീഷർട്ടും ധരിച്ച് ​ഗവർണർക്കെതിരെ എസ് എഫ്ഐ പ്രതിഷേധം, വനിതാ പ്രവർത്തകർ ഉൾപ്പെടെയുള്ളവർ അറസ്റ്റിൽ

തേഞ്ഞിപ്പലം: ഞങ്ങള്‍ക്ക് വേണ്ടത് ചാന്‍സലറെയാണ്, സവര്‍ക്കറയല്ല’ .കാലിക്കറ്റ് സര്‍വകലാശാലയില്‍ ഗവര്‍ണര്‍ക്കെതിരായ എസ്.എഫ്.ഐ. പ്രതിഷേധം. ഗവര്‍ണര്‍ താമസിക്കുന്ന ഗസ്റ്റ് ഹൗസിന് സമീപം പ്രകടനമായെത്തിയ നൂറ് കണക്കിന് എസ്.എഫ്.ഐ. പ്രവര്‍ത്തകരെ പോലീസ് തടഞ്ഞു. കരിങ്കൊടിയുമായി ചാടിവീണ വനിതാപ്രവര്‍ത്തകര്‍ അടക്കമുള്ളവരെ പോലീസ് അറസ്റ്റ് ചെയ്ത് നീക്കി.

എസ്.എഫ്.ഐ. സംസ്ഥാന സെക്രട്ടറി പി.എം. ആര്‍ഷോയുടെ നേതൃത്വത്തിലായിരുന്നു പ്രതിഷേധം. കറുത്ത ടീഷര്‍ട്ട് ധരിച്ചാണ് ആര്‍ഷോ അടക്കം എത്തിയത്. ടീ ഷര്‍ട്ടില്‍ ‘സംഘി ചാന്‍സലര്‍ വാപ്പസ് ജാവോ’ എന്ന് ഇംഗ്ലീഷില്‍ എഴുതിയിരുന്നു. പ്രവര്‍ത്തകരുടെ കൈയില്‍ കറുത്ത ബലൂണുകളും ഉണ്ടായിരുന്നു.

പ്രതിഷേധം സമാധാനപരമായി തുടരുമെന്ന് പ്രതീക്ഷിച്ചുനില്‍ക്കെ, അപ്രതീക്ഷിതമായാണ് കറുത്ത ബാഡ്ജും ടീഷര്‍ട്ടും ധരിച്ച് വനിതാ പ്രവര്‍ത്തകരടക്കം ബാരിക്കേഡ് മറികടക്കാന്‍ ശ്രമിച്ചത്. ഇതോടെ പ്രതിഷേധം സംഘര്‍ഷത്തിലെത്തുകയായിരുന്നു. കനത്ത സുരക്ഷ ഭേദിച്ച് പ്രവര്‍ത്തകര്‍ ഗസ്റ്റ് ഹൗസിന് സമീപം കരിങ്കൊടിയുമായി എത്തി. ഇവരെ പോലീസ് അറസ്റ്റ് ചെയ്തു. തുടര്‍ന്ന് സംസ്ഥാന പ്രസിഡന്റ് അനുശ്രീ ഉള്‍പ്പെടെ വീണ്ടും കരിങ്കൊടിയുമായെത്തി. പ്രവര്‍ത്തകരെ നിലത്തിട്ടിഴച്ചാണ് പോലീസ് അറസ്റ്റ് ചെയ്തു നീക്കിയത്.