അന്ന് കാറും നൂറ്റൊന്നു പവനും കാണിക്ക വച്ച് വന്നതല്ല… ഷാജു ശ്രീധര്‍ പറയുന്നു

വിസ്മയയുടെ മരണം കേരളത്തെ ഒന്നാകെ സങ്കടക്കടലിലാഴ്ത്തിയിരിക്കുകയാണ്. ഭര്‍തൃഗൃഹത്തില്‍ സ്ത്രീധനത്തിന്റെ പേരില്‍ ഭര്‍ത്താവില്‍ നിന്നും വലിയ ക്രൂരതയാണ് നേരിടേണ്ടി വന്നത്. ഇപ്പോഴും സംസ്ഥാനത്ത് പല സ്ത്രീകളും ഇത്തരത്തില്‍ സ്ത്രീധനത്തിന്റെ പേരില്‍ പല ദുരിതങ്ങളും അനുഭവിക്കുന്നുണ്ട്. ഈ സാഹചര്യത്തില്‍ നടന്‍ ഷാജു ശ്രീധര്‍ നടത്തിയ അഭിപ്രായ പ്രകടനം ശ്രദ്ധേയമാവുകയാണ്.

സ്ത്രീധനത്തിന്റെ പേരില്‍ ക്രൂര പീഡനത്തിന് ഇരയാകുന്ന പെണ്‍കുട്ടികളുടെ വാര്‍ത്തകള്‍ കേള്‍ക്കുമ്പോള്‍ ഭയപ്പാട് തോന്നുന്നുവെന്ന് ഷാജു പറയുന്നു. ഭാര്യയുമൊത്ത് ഒരുമിച്ച് ജീവിക്കാന്‍ തീരുമാനിച്ചത് പണത്തിന്റെ പേരിലല്ല, മനസിന്റെ ചേര്‍ച്ചയിലാണെന്നും ഷാജു പറഞ്ഞു.

‘അന്ന് കാറും നൂറ്റൊന്നു പവനും കാണിക്ക വച്ച് വന്നതല്ല… ഇനിയുള്ള കാലം ഒരേ മനസ്സോടെ ജീവിക്കണമെന്ന് തീരുമാനിച്ചും ആഗ്രഹിച്ചും ഇറങ്ങിത്തിരിച്ചവര്‍..പക്ഷേ ഇന്ന് വാര്‍ത്തകള്‍ കേള്‍ക്കുമ്പോള്‍ ഭയപ്പാട് തോന്നുന്ന രണ്ടു പെണ്മക്കളുടെ മാതാപിതാക്കളാണ് ഞങ്ങളും…’-ഷാജു പറയുന്നു.

പഴയകാല നടി ചാന്ദ്‌നിയെയാണ് ഷാജു വിവാഹം ചെയ്തത്. ഷീജുവിനും ചാന്ദ്‌നിക്കും രണ്ട് പെണ്‍മക്കളാണ് ഉള്ളത്. നന്ദന, നീലാഞ്ജന എന്നിങ്ങനെയാണ് മക്കളുടെ പേര്. അയ്യപ്പനും കോശിയും എന്ന ചിത്രത്തില്‍ പൃഥ്വിരാജ് കഥാപാത്രമായ കോശിയുടെ മകളുടെ വേഷത്തില്‍ എത്തിയത് നീലാഞ്ജന ആയിരുന്നു. STD XE 99 BATCH എന്ന ചിത്രത്തിലൂടെ നന്ദനയും നായികയായി അരങ്ങേറ്റം കുറിക്കാനുള്ള ഒരുക്കത്തിലാണ്.