കിന്നാരത്തുമ്പികളില്‍ അഭിനയിച്ചത് അമ്മയുടെ നിര്‍ബന്ധത്തിന് വഴങ്ങി; ഷക്കീല

ഗ്ലാമറസ് വേഷത്തിന്റെ പേരിലാണ് പലപ്പോഴും ഷക്കീലയെ വിശേഷിപ്പിക്കാറുള്ളത്. വീട്ടിലെ പ്രതികൂല സാഹചര്യത്തിനിടയിലാണ് താന്‍ അഭിനയത്തിലേക്ക് തിരിഞ്ഞതെന്നും സ്വന്തമായി അഭിപ്രായമൊന്നുമില്ലാത്ത സമയത്ത് കരിയറിലെ തുടക്കകാലത്താണ് അത്തരത്തിലുള്ള വേഷങ്ങള്‍ സ്വീകരിച്ചതെന്നും ഷക്കീല തന്നെ പലപ്പോഴായി പറഞ്ഞിട്ടുണ്ട്. എന്നാല്‍ അവര്‍ മുമ്പ് അഭിനയിച്ച സിനിമകളുടെ പേരിലാണ് അവര്‍ ഇപ്പോഴും വിലയിരുത്തപ്പെടുന്നത്. ഷക്കീല എന്ന പേര് കേള്‍ക്കുന്നതു തന്നെ പലര്‍ക്കും പുച്ഛമാണ്.

ഇഷ്ടപ്പെടാത്ത രീതിയില്‍ ആരെങ്കിലും പെരുമാറിയുട്ടുണ്ടെങ്കില്‍ അപ്പോള്‍ തന്നെ പ്രതികരിക്കണമെന്ന് നടി ഷക്കീല. തന്റെ ജീവിതം ആസ്പദമാക്കി ഒരുങ്ങുന്ന സിനിമയുടെ പ്രചാരണവുമായി ബന്ധപ്പെട്ട് നല്‍കിയ അഭിമുഖത്തിലായിരുന്നു ഷക്കീലയുടെ തുറന്നുപറച്ചില്‍. മോശം അനുഭവങ്ങള്‍ നേരിടുമ്പോള്‍ അപ്പോള്‍ തന്നെ ചെരുപ്പെടുത്ത് അത്തരക്കാരുടെ മുഖത്ത് അടിക്കണമായിരുന്നു. തനിക്കും ഒരുപാട് ദുരനുഭവങ്ങള്‍ ഉണ്ടായിട്ടുണ്ട്. എന്നാല്‍ ”പഴയ കാര്യങ്ങള്‍ പറയുന്നതില്‍ എനിക്ക് എന്തോ യോജിപ്പില്ല. അതെല്ലാം വെല്ലുവിളിയായി ഏറ്റെടുത്ത് ജീവിച്ചു കാണിക്കുകയാണ് താന്‍ ചെയ്തതെന്നും ഷക്കീല പറഞ്ഞു.

കിന്നാരത്തുമ്പികള്‍ എന്ന സിനിമയില്‍ അഭിനയിക്കുന്നത് തന്റെ അമ്മയുടെ നിര്‍ബന്ധത്തിന് വഴങ്ങിയായിരുന്നെന്നും ഷക്കീല പറഞ്ഞു. സിനിമകളില്‍ വ്യത്യസ്ഥമായ വേഷങ്ങള്‍ ചെയ്യണമെന്നായിരുന്നു തന്റെ ആഗ്രഹമെന്നും എന്നാല്‍ ഒരിക്കല്‍ പോലും ആഗ്രഹിച്ച വേഷങ്ങള്‍ ലഭിച്ചില്ലെന്നും ഷക്കീല പറയുന്നു. പണ്ട് തന്റെ സിനിമകള്‍ നിര്‍മ്മിച്ചും വിതരണം ചെയ്തും പലരും വലിയ പണക്കാരായി മാറിയെന്നും എന്നാല്‍ ഇന്ന് അവര്‍ക്ക് ആര്‍ക്കും തന്നെ ഓര്‍മ്മയില്ലെന്നും ഷക്കീല പറഞ്ഞു.സിനിമയുമായി ബന്ധപ്പെട്ട് ആരുമായും ഇന്ന് ബന്ധമില്ലെന്നും ഷക്കീല പറഞ്ഞു. മലയാളത്തില്‍ നിന്ന് തമിഴിലേക്ക് വന്നപ്പോള്‍ തനിക്ക് അവസരങ്ങള്‍ ഇല്ലാതായെന്നും നാല് വര്‍ഷത്തോളം ജോലിയില്ലായിരുന്നെന്നും അവര്‍ അഭിമുഖത്തില്‍ പറഞ്ഞു.

1990 കളിൽ മലയാളം തമിഴ് ചിത്രങ്ങളിലൂടെയായിരുന്നു രംഗപ്രവേശം. മാദകവേഷങ്ങളാണ് കൂടുതലും ചെയ്തിട്ടുള്ളത്. 1977-ൽ മദ്രാസിലാണ് ജനനം. സിൽക് സ്മിത പ്രധാനവേഷം അവതരിപ്പിച്ച പ്ലേഗേൾസ് എന്ന തമിഴ് സിനിമയിൽ വേഷം ചെയ്തുകൊണ്ട് പതിനെട്ടാം വയസ്സിലാണ് ഷക്കീല സിനിമാ ജീവിതം തുടങ്ങുന്നത്. ഇളമനസ്സേ കിള്ളാതെ എന്ന തമിഴ് ചിത്രത്തിലെ പ്രകടനത്തോടെ മുഖ്യധാരയിൽ ശ്രദ്ധിക്കപ്പെട്ടു തുടങ്ങി. മലയാളത്തിൽ അഭിനയിച്ച കിന്നാരത്തുമ്പികൾ എന്ന ചലച്ചിത്രം വൻ വിജയമായിരുന്നു. ഒട്ടേറെ മലയാളം സിനിമകളിൽ വേഷമിട്ടിട്ടുണ്ട്. കിന്നാരത്തുമ്പികൾ, ഡ്രൈവിംഗ് സ്കൂൾ, സിസ്റ്റർ മരിയ തുടങ്ങിയതിൽ വേഷങ്ങൾ ശ്രദ്ധിക്കപ്പെട്ടിരുന്നു.ഞാൻ നിങ്ങളുടെ രാത്രിയുടെ ഭാഗമയിരുന്നു എന്ന പേരിൽ ആത്മകഥയും ഷക്കീല പ്രസിദ്ധീകരിച്ചിട്ടുണ്ട്. ഇവരുടെ പൂർണ്ണനാമം സി.ഷക്കീല ബീഗം എന്നാണ്. സാമൂഹിക പ്രവർത്തനത്തിലും ജീവകാരുണ്യ പ്രവർത്തനത്തിലും ഷക്കീല ഏറെ സജീവമാണ്. ട്രാൻസ്ജന്ഡർ കുട്ടികൾക്ക് വേണ്ടിയുള്ള അഭയകേന്ദ്രം അതിലൊന്നാണ്.