ശശി തരൂരിനെ തിരുവനന്തപുരത്ത് തോല്‍പ്പിക്കാനാകില്ല, ജനങ്ങളെ തരൂര്‍ സ്വാധീനിച്ചു

തിരുവനന്തപുരം. ശശി തരൂരിനെ തിരുവനന്തപുരത്ത് തോല്‍പ്പിക്കാനാകില്ലെന്ന് മുതിര്‍ന്ന ബിജെപി നേതാവ് ഒ രാജഗോപാല്‍. കര്‍ണാടക ഉപമുഖ്യമന്ത്രി ഡികെ ശിവകുമാറും ശശി തരൂരും പങ്കെടുത്ത അവാര്‍ഡ് ദാന ചടങ്ങിലാണ് ഒ രാജഗോപാലിന്റെ പരാമര്‍ശം. തിരുവനന്തപുരത്തെ ജനങ്ങളെ തരൂര്‍ സ്വാധീനിച്ചു.

അതേസമയം ഒ രാജഗോപാലിന്റെ കാല്‍ തൊട്ട് വന്ദിച്ച ശേഷമാണ് ശശി തരൂര്‍ വേദിവിട്ടത്. അടുത്ത കാലത്ത് മറ്റൊരാള്‍ക്ക് അവസരം ലഭിക്കുമോ എന്ന് സംശയിക്കുന്നതായും തരൂരിന്റെ സേവനം കൂടുതല്‍ ലഭ്യമാകട്ടെ എന്നു പ്രാര്‍ഥിക്കുന്നതായും രാജഗോപാല്‍ പറഞ്ഞു.

ശശി തരൂരിന്റെ മഹിമ ലോകം അംഗീകരിക്കുന്നു. തിരുവനന്തപുരത്ത് മത്സരിക്കാന്‍ തീരുമാനിച്ചപ്പോള്‍ സംസാരിച്ചിരുന്നു. യുഎന്നില്‍ ഇന്ത്യയെ പ്രതിനിധീകരിക്കാന്‍ ഏറ്റവും യോഗ്യന്‍ തന്നെയാണ്. ഇക്കാര്യത്തില്‍ സംശയമില്ല. പിന്നെ എന്തിനാണ് തിരുവനന്തപുരത്ത് മത്സരിക്കുന്നതെന്ന് ചോദിച്ചു. അത്ഭുതം എന്ന് പറയട്ടെ തിരുവനന്തപുരത്തുകാരുടെ മനസ്സിനെ സ്വാധീനിക്കാന്‍ അദ്ദേഹത്തിന് കഴിഞ്ഞുവെന്ന് രാജഗോപാല്‍ അഭിപ്രായപ്പെട്ടു.