10% പ്രതീക്ഷിച്ചാൽ മതി എന്ന് പറഞ്ഞതാണ് ഡോക്ടർ, പച്ചതുണിയിൽ പൊതിഞ്ഞ ഒരു കുഞ്ഞു മുഖം, മകൾക്ക് അച്ഛന്റെ പിറന്നാൾ ആശംസ

ഷിബു വിൻസന്റ് എന്ന അച്ഛൻ മകൾക്ക് ജന്മദിനാശംസകൾ നേർന്നെഴുതിയ കുറിപ്പ് ശ്രദ്ധേയമാകുന്നു. 10 ശതമാനം മാത്രം പ്രതീക്ഷിച്ചാൽ മതി എന്ന് പറഞ്ഞതാണ് ഡോക്ടർ.. 10 വർഷം മുമ്പ് ഒരു പുതുവർഷ പിറ്റേന്നു.. അത് പറയുമ്പോൾ ഡോക്ടറുടെ കണ്ണിൽ കണ്ട കരുണയും ചേർത്ത് പിടിച്ചപ്പോഴുള്ള ആ കയ്യിലെ ചൂടും ഇപ്പോഴും feel ചെയ്യുന്നുണ്ട്… പുതുവർഷത്തിലെ സന്തോഷങ്ങളൊക്കെ ആവിയായിപ്പോയ ആ ഒറ്റ നിമിഷം…എട്ടു മാസത്തിന്റെ കാത്തിരിപ്പിനൊടുവിൽ കേട്ട വാക്കുകൾ.. കണ്ണിലെ മൂടൽമഞ്ഞു എപ്പോഴാണ് മാറിയതെന്ന് ഓർക്കുന്നില്ലെന്ന് ഷിബു വികാര നിർഭരമായി കുറിക്കുന്നു

കുറിപ്പിന്റെ പൂർണ്ണരൂപം

10 ശതമാനം മാത്രം പ്രതീക്ഷിച്ചാൽ മതി എന്ന് പറഞ്ഞതാണ് ഡോക്ടർ.. 10 വർഷം മുമ്പ് ഒരു പുതുവർഷ പിറ്റേന്നു.. അത് പറയുമ്പോൾ ഡോക്ടറുടെ കണ്ണിൽ കണ്ട കരുണയും ചേർത്ത് പിടിച്ചപ്പോഴുള്ള ആ കയ്യിലെ ചൂടും ഇപ്പോഴും feel ചെയ്യുന്നുണ്ട്… പുതുവർഷത്തിലെ സന്തോഷങ്ങളൊക്കെ ആവിയായിപ്പോയ ആ ഒറ്റ നിമിഷം…എട്ടു മാസത്തിന്റെ കാത്തിരിപ്പിനൊടുവിൽ കേട്ട വാക്കുകൾ.. കണ്ണിലെ മൂടൽമഞ്ഞു എപ്പോഴാണ് മാറിയതെന്ന് ഓർക്കുന്നില്ല..

മണിക്കൂറുകൾക്കൊടുവിൽ ശ്രീ ചിത്രയിലെ ന്യൂറോ ഐസിയുവിൽ നിന്നും പുറത്തു വന്ന ഡോക്ടറുടെ കയ്യിലെ പച്ചതുണിയിൽ പൊതിഞ്ഞ ഒരു കുഞ്ഞു മുഖം…. ഡോക്ടർക്കു ഒപ്പം കൂടെ ഓടി ലിഫ്റ്റിൽ കയറി പുറത്തു കാത്തുകിടന്ന ആംബുലൻസിൽ SAT യിലേക്ക്… അവിടെനിന്നും മറ്റൊരു ആംബുലൻസിൽ വീണ്ടും വേറൊരു Neonatal ICU വിലേക്കുള്ള പാച്ചിൽ വൈകുന്നേരം…നേർത്ത ട്യൂബുകൾക്കിടയിൽ തണുത്ത ICU വിൽ മൂടിപൊതിഞ്ഞ മുഖം കാണുമ്പോൾ ഉള്ള സന്തോഷം. കുറേ വർഷങ്ങൾക്കിപ്പുറവും ആംബുലൻസിന്റെ നിലവിളി കേട്ടാൽ ഉള്ളിൽ ആളുന്ന ആന്തൽ മാറാൻ ഏറെ നേരം വേണം.. അതുകൊണ്ടാവും പിന്നീടെപ്പോഴോ Traffic എന്ന സിനിമയിൽ ശ്രീനിവാസൻ ഓടിച്ച ആംബുലൻസിനൊപ്പം എന്റെ നെഞ്ചും നീറിപിടഞ്ഞത്‌… ശ്വാസം അടക്കിപിടിച്ചിരുന്നത്…

ആ പേടകത്തിലെ കുഞ്ഞു ഹൃദയത്തിനേക്കാളും വേഗത്തിൽ ഓടുന്ന എന്റെ ഹൃദയമിടിപ്പു ഞാൻ അറിഞ്ഞത്.. ഞാൻ ആടിത്തീർത്ത ജീവിതത്തിലെ വേറെ ചില കഥാപാത്രങ്ങൾ….പിന്നെ അവൾ മെല്ലെ കണ്ണുതുറന്നു.. നോക്കിചിരിച്ചു.. തോളിൽ മുറുകെപിടിച്ചു മുഖം അമർത്തികിടന്നു… കൊച്ചു കൊച്ചു സന്തോഷങ്ങളും പിണക്കങ്ങളും പരിഭവങ്ങളും… മുഖമൊന്നു വാടിയാൽ പുറകേനടന്നു കാരണം അന്വേഷിക്കാൻ ഒരാൾ… ചില തോൽവികൾക്കൊടുവിലും തോറ്റിട്ടില്ല എന്നോർമിപ്പിക്കുന്ന ആ മുഖം ഞാൻ കണ്ടതിന്റെ പത്താം വാർഷികം.. വീണ്ടും ഒരു പിറന്നാൾ…