എന്റെ ഷിന്‍സി പോയാല്‍ ഞാനെന്തു ചെയ്യുമെന്ന് അശ്വതി ചോദിച്ചിരുന്നു, ഉറ്റ സുഹൃത്തുക്കളുടെ വേര്‍പാടില്‍ പിടഞ്ഞ് സഹപ്രവര്‍ത്തകര്‍

റിയാദ്: ജീവിതവും ജോലിയും മരണവും ഒന്നിച്ച്. സൗദി അറേബ്യയില്‍ നടന്ന വാഹനാപകടത്തില്‍ മരിച്ച കോട്ടയം വയല സ്വദേശി ഷിന്‍സി ഫിലിപ്പും നെയ്യാറ്റിന്‍കര സ്വദേശി അശ്വതി വിജയനുമാണ് മരണത്തിലും പിരിയാത്ത ആത്മ സുഹൃത്തുക്കളായത്. ഇരുവരും ജോലിയും താമസവും യാത്രകളും ആഘോഷവും എല്ലാം ഒരുമിച്ചായിരുന്നു എന്ന് നജ്‌റാന്‍ കിങ് ഖാലിദ് ആശുപത്രിയിലെ സഹപ്രവര്‍ത്തകയായ കൊല്ലം സ്വദേശിനി അശ്വതി മഹേഷ് പറഞ്ഞു.

ജോലിയില്‍ നല്ല ആത്മാര്‍ഥതയുള്ളവരായിരുന്നു ഇരുവരും. ഷിന്‍സി ഐസിയുവിലും അശ്വതി എമര്‍ജന്‍സി വിഭാഗത്തിലുമായിരുന്നു ജോലി. സ്വന്തം ഡിപ്പാര്‍ട്‌മെന്റിലെ ജോലി കഴിഞ്ഞ ശേഷം മറ്റു വിഭാഗങ്ങളില്‍ എത്തി എന്തെങ്കിലും ഹെല്‍പ് വേണോ എന്ന് ഇരുവരും ചോദിക്കുമായിരുന്നു. വേണ്ട സഹായങ്ങളെല്ലാം ചെയ്താണ് മടങ്ങുക. ആര്‍ക്ക് എന്തു സഹായത്തിനും വിളിക്കാന്‍ പറ്റുമായിരുന്നു.- അശ്വതി വിതുമ്പികൊണ്ട് പറഞ്ഞു.

ഇനി അവരില്ലെന്ന് ഓര്‍ക്കുമ്പോള്‍ സഹിക്കാനാവുന്നില്ലെന്നു കണ്ണൂര്‍ സ്വദേശി സിന്ധുവും പറഞ്ഞു. ഷിന്‍സി സൗദിയിലെ ജോലി രാജിവച്ച് ബഹ്‌റൈനിലെ ഭര്‍ത്താവ് ബിജോ കുര്യന്റെ അടുത്തേക്കു പോകുന്നതിനു മുന്‍പ് ഉറ്റ സുഹൃത്തുക്കളെല്ലാം ചേര്‍ന്ന് 80 കി.മീ അകലെയുള്ള കൂട്ടുകാരിയെ കാണാന്‍ പോയി തിരിച്ചുവരുന്നതിനിടെയായിരുന്നു അപകടം. ‘എന്റെ ഷിന്‍സി പോയാല്‍ ഞാനെന്തു ചെയ്യുമെന്ന്’ അശ്വതി സഹപ്രവര്‍ത്തകരോടു പറയുമായിരുന്നുവെന്ന് സിന്ധു പറയുന്നു.

ജോലി രാജിവച്ച് ഷിന്‍സിയോടൊപ്പം ബഹ്‌റൈനിലേക്കു പോയാലോ എന്ന ആലോചന അശ്വതിക്കുണ്ടായിരുന്നു എന്നും സഹപ്രവര്‍ത്തകര്‍ പറയുന്നു. ഇരുവരും തമ്മിലുള്ള ആത്മബന്ധത്തിന്റെ ഓരോ നിമിഷവും ഫ്രെയിമിലാക്കി പ്രിന്റെടുത്ത് താമസിക്കുന്ന മുറിയില്‍ ഒട്ടിച്ചുവച്ചതു കാണുമ്പോള്‍ സഹിക്കാനാവുന്നില്ലെന്ന് ഇവര്‍ പറഞ്ഞു.