മുഖ്യനും മകൾക്കും എതിരെ പുറത്തുവന്നത് അഴിമതിയുടെ ഒരു അറ്റം മാത്രം, ഷോൺ ജോർജ്

പത്തനംതിട്ട : മാസപ്പടി വിവാദത്തിൽ മുഖ്യമന്ത്രിയുടെ മകളാണ് ഈ അഴിമതിക്കെല്ലാം ചുക്കാൻ പിടിക്കുന്നതെന്ന് പരാതിക്കാരനായ കേരള ജനപക്ഷം നേതാവ് ഷോൺ ജോർജ്. അഴിമതികളുടെ എല്ലാം തലപ്പത്ത് മുഖ്യമന്ത്രി പിണറായി വിജയനാണ്. ഇതൊന്നും ചോദ്യം ചെയ്യാൻ ഇവിടെ ആരുമില്ല. അതിനാലാണ് തന്നെക്കൊണ്ട് ആകുന്ന രീതിയിൽ പ്രതികരിച്ചതും പരാതി നൽകിയതും. ഈ അഴിമതികളെല്ലാം ചെന്നെത്തുന്നത് മുഖ്യമന്ത്രി പിണറായി വിജയനിലേക്കാണ്.

കേന്ദ്ര കോർപ്പറേറ്റ് അഫയേഴ്‌സ് മന്ത്രാലയമാണ് മുഖ്യമന്ത്രിയുടെ മകൾ വീണാ വിജയന്റെ കമ്പനി എക്‌സാലോജിക്കിനെതിരെ അന്വേഷണത്തിന് ഉത്തരവിട്ടത്. ബെംഗളുരു, കൊച്ചി രജിസ്ട്രാർ ഓഫ് കമ്പനീസിന്റെ റിപ്പോർട്ടുകളുടെ അടിസ്ഥാനത്തിലാണ് അന്വേഷണത്തിന് കേന്ദ്രം ഉത്തരവിട്ടിരിക്കുന്നത്.
കർണാടക, തമിഴ്നാട്, പുതുച്ചേരി എന്നിവിടങ്ങളിൽ നിന്നുള്ള ഉദ്യോഗസ്ഥർ അന്വേഷണത്തിൽ ഭാഗമാകും. നാല് മാസത്തിനകം അന്വേഷണം നടത്തി റിപ്പോർട്ട് സമർപ്പിക്കാനാണ് മന്ത്രാലയം നിർദ്ദേശിച്ചിരിക്കുന്നത്.

ബെംഗളുരു രജിസ്ട്രാർ ഓഫ് കമ്പനീസും കൊച്ചി രജിസ്ട്രാർ ഓഫ് കമ്പനീസും നടത്തിയ അന്വേഷണത്തിൽ വലിയ എക്സാലോജിക് ഉപയോഗിച്ച് വലിയ ക്രമക്കേടുകൾ നടന്നതായി കണ്ടെത്തിയിരുന്നു.