പറയാന്‍ കൊള്ളരുതാത്തതു വല്ലതും അങ്ങേക്ക് അറിയാമെങ്കില്‍ അത് വെളിപ്പെടുത്തണം സര്‍, എം എം മണിക്കെതിരെ സിന്‍സി അനില്‍

അതിജീവിതയ്ക്ക് എതിരെ എംഎം മണി നടത്തിയ പ്രസ്താവനയ്ക്ക് എതിരെ രംഗത്ത് എത്തിയിരിക്കുകയാണ് സിന്‍സി അനില്‍. ഇതൊരു നാണം കെട്ട കേസ് ആണെന്നും, പറയാന്‍ കൊള്ളാത്ത പലതും കേസിലുണ്ടെന്നുമായിരുന്നു മണി പറഞ്ഞത്. നാണംകെട്ട ,പറയാന്‍ കൊള്ളരുതാത്ത കേസാണെന്ന അഭിപ്രായം എങ്ങനെ വന്നു സര്‍? പറയാന്‍ കൊള്ളരുതാത്തതു വല്ലതും അങ്ങേക്ക് അറിയാമെങ്കില്‍ അത് വെളിപ്പെടുത്തണമെന്ന് സിന്‍സി പറയുന്നു.

സിന്‍സി അനിലിന്റെ വാക്കുകള്‍ ഇങ്ങനെ, അന്വേഷണത്തില്‍ വിശ്വാസമില്ലെങ്കില്‍ അതു പറയാന്‍ അതിജീവിതയ്ക്ക് അവകാശമുണ്ട് സര്‍. ജുഡീഷ്യല്‍ നടപടികളില്‍ സംശയമുണ്ടെങ്കില്‍ അതു പ്രകടിപ്പിക്കാനും അവകാശമുണ്ട്. പിന്നെ നാണംകെട്ട ,പറയാന്‍ കൊള്ളരുതാത്ത കേസാണെന്ന അഭിപ്രായം എങ്ങനെ വന്നു സര്‍? പറയാന്‍ കൊള്ളരുതാത്തതു വല്ലതും അങ്ങേക്ക് അറിയാമെങ്കില്‍ അത് വെളിപ്പെടുത്തണം സര്‍.

തനിക്കേറ്റ പീഡനങ്ങള്‍ക്കെതിരെ, അപമാനത്തിനെതിരെ, കരിയറിലേറ്റ തിരിച്ചടിക്കെതിരെ വ്യക്തിഹത്യയ്‌ക്കെതിരെ നിയമ വഴി തേടുന്ന ഒരു സ്ത്രീയെ തോല്പിക്കാന്‍ അക്രമിക്കൊപ്പം ആരു നിന്നാലും അത് നാണക്കേടു തന്നെയാണ് സര്‍. തെരഞ്ഞെടുപ്പുകള്‍ വരും പോകും, കുറച്ചു വോട്ടോ സീറ്റോ അല്ല നമുക്കു പ്രശ്‌നം എന്നു പരസ്യമായി പ്രഖ്യാപിച്ച ഒരു മനുഷ്യന്‍ ഇപ്പോഴും കേരളത്തിന്റെ മുഖ്യമന്ത്രിയാണ് സാര്‍.

നമുക്കൊപ്പം നടക്കുമ്പോള്‍ അതിജീവിത ,നമുക്കെതിരെ നില്‍ക്കുമ്പോള്‍ അതിബുദ്ധിക്കാരി എന്ന നിലപാട് ശരിയല്ല സര്‍. നമ്മളങ്ങനെയായിക്കൂട സര്‍. പണത്തിനു മീതെ പറക്കുന്ന പരുന്തുകളുണ്ട് എന്നു തെളിയിക്കുന്നതാണ് സര്‍ അഭിമാനം. അല്ലെങ്കിലാണ് നാണക്കേടായിപ്പോവുക.. അപ്പോള്‍ തിരുത്തുകയല്ലേ?. അഭിവാദ്യങ്ങള്‍. അതിജീവിതയ്‌ക്കൊപ്പമാണ്, നിസ്സംശയം