പ്രണയിതാക്കൾ മരിച്ച് ആറ് മാസത്തിനുശേഷം പ്രതിമ നിർമിച്ച് പ്രതീകാത്മകമായി വിവാഹം നടത്തി ബന്ധുക്കൾ

ഗാന്ധിനഗർ. പ്രണയിതാക്കൾ മരിച്ച് ആറ് മാസത്തിനുശേഷം അവരുടെ പ്രതിമ നിർമിച്ച് പ്രതീകാത്മകമായി വിവാഹം നടത്തി ബന്ധുക്കൾ. ഗുജറാത്തിലെ താപിയിലാണ് സംഭവം. പ്രണയത്തിലായിരുന്ന ഗണേഷും രഞ്ജനയും 2022 ഓഗസ്റ്റിലാണ് മരിച്ചത്. ഇരുവരേയും തൂങ്ങിമരിച്ച നിലയിലാണ് കണ്ടെത്തിയത്.

പ്രണയബന്ധത്തെ വീട്ടുകാർ എതിർത്തതോടെ ഇരുവരും ജീവനൊടുക്കുകയായിരുന്നു. ഗണേഷും രഞ്ജനയും മരിക്കാൻ കാരണം തങ്ങളാണെന്ന കുറ്റബോധത്തിൽ, ജീവിച്ചിരിക്കുമ്പോൾ ഒന്നിക്കാൻ സാധിക്കാത്ത ഇരുവരുടേയും പ്രതിമകൾ പണിത് ബന്ധുക്കൾ വിവാഹം നടത്തുകയായിരുന്നു. എല്ലാ ചടങ്ങുകളോടെയുമായിരുന്നു വിവാഹം.

തങ്ങളുടെ അകന്ന ബന്ധുവായതിനാലാണ് ഗണേഷുമായുള്ള വിവാഹത്തെ എതിർത്തതെന്ന് രഞ്ജനയുടെ മുത്തച്ഛനായ ഭീംസിങ് പാദ്വി പറഞ്ഞു. ഗണേഷും രഞ്ജനയും തമ്മിൽ തീവ്രപ്രണയമുണ്ടായിരുന്നുവെന്ന് മസിലായതിനാലാണ് ഇത്തരത്തിൽ വിവാഹം നടത്താൻ ഇരുകൂട്ടരും ചേർന്ന് തീരുമാനിച്ചതെന്നും അദ്ദേഹം പറഞ്ഞു.