ബിഎസ്എഫ് ഭടൻമാരുമായുള്ള ഏറ്റുമുട്ടലിൽ കള്ളക്കടത്തുകാരൻ കൊല്ലപ്പെട്ടു

പശ്ചിമ ബംഗാളിലെ മുർഷിദാബാദ് ജില്ലയിൽ ബിഎസ്എഫ് ഭടൻമാരുമായുള്ള ഏറ്റുമുട്ടലിൽ കള്ളക്കടത്തുകാരൻ കൊല്ലപ്പെട്ടു. അതിർത്തിയിൽ നുഴഞ്ഞ് കയറിയ ഒരു സംഘം കള്ളക്കടത്തുകാർ തടയാൻ ശ്രമിച്ച ബി എസ് എഫ് ഭടൻമാരെ ആക്രമിക്കുകയായിരുന്നു. കല്ലും മൂർച്ചയേറിയ ആയുധവുമായിരുന്നു ഇവരുടെ പക്കലുണ്ടായിരുന്നത്.

ഇന്ന് പുലർച്ചെ 141 ബറ്റാലിയനിലെ ബോർഡർ ഔട്ട് പോസ്റ്റ് സാഗർപാറ പ്രദേശത്താണ് സംഭവം നടന്നത്. ബിഎസ്എഫിന്റെ രഹസ്യന്വേഷണ വിഭാഗത്തിൽ നിന്ന് ലഭിച്ച വിവരത്തെ തുടർന്നാണ് പെട്രോളിംഗ് സംഘം അതിർത്തി നിരീക്ഷണം ശക്തമാക്കിയത്. സ്ഥലത്ത് പരിശോധന നടത്തിയ സൈന്യം ഫെൻസഡൈലിന്റെ 532 കുപ്പികൾ കണ്ടെടുത്തു.

പുലർച്ചെ മൂന്ന് മണിയോടെ പ്രദേശത്ത് കള്ളക്കടത്തുകാരുടെ നീക്കം മനസിലാക്കിയ സൈനികർ അവരെ തടയാൻ ശ്രമിച്ചത്. എന്നാൽ കല്ലും, ആയുധങ്ങളുമായി സൈനികരെ ആക്രമിക്കാൻ കള്ളക്കടത്ത് സംഘം തീരുമാനിച്ചതോടെ സൈന്യം വെടിവയ്ക്കുകയായിരുന്നു. വെടിവയ്പ്പിൽ നുഴഞ്ഞ് കയറ്റക്കാരിൽ ഒരാളെ വധിച്ചു. മുർഷിദാബാദ് സ്വദേശിയായ റോഹിൽ മണ്ഡലാണ് മരിച്ച കള്ളക്കടത്തുകാരനെന്ന് തിരിച്ചറിഞ്ഞു.