പ്രാര്‍ഥനകള്‍ വിഫലമായി, ലഡാക്കിലെ ഹിമപാതത്തില്‍ അകപ്പെട്ട മലയാളി സൈനികന്‍ ഷാനവാസ് വിടവാങ്ങി

ചവറ: ഒരു നാട് മുഴുവന്‍ പ്രാര്‍ത്ഥനയോടെ കാത്തിരുന്നിട്ടും അതെല്ലാം വിഫലമാക്കി ബുധനാഴ്ച രാത്രിയോടെ ഷാനവാസിന്റെ വിയോഗ വാര്‍ത്ത എത്തി. വീട്ടുകാര്‍ക്കും നാട്ടുകാര്‍ക്കും സുഹൃത്തുക്കള്‍ക്കും ഒന്നും ആ വാര്‍ത്ത ഉള്‍ക്കൊള്ളാനും ആയിട്ടില്ല. ലഡാക്കില്‍ ജോലി ചെയ്യുന്നതിനിടെ ഹിമപാതത്തില്‍ പെട്ട് പരുക്ക് പറ്റി സൈനിക ആശുപത്രിയില്‍ ചികിത്സയില്‍ കഴിയവെയാണ് സൈനികനായ ഷാനവാസ് മരിച്ചത്. ഷാനവാസ് ആശുപത്രിയില്‍ ആണെന്ന വിവരം ലഭിച്ചപ്പോള്‍ മുതല്‍ പ്രാര്‍ത്ഥനയിലും സുഖം പ്രാപിക്കുമെന്ന വിശ്വാസത്തിലുമായിരുന്നു ഏവരും.

രണ്ട് കുഞ്ഞുങ്ങളും ഏഴ് മാസം ഗര്‍ഭിണിയായ ഭാര്യയും ഷാനവാസിന്റെ തിരിച്ചു വരവിനായി പ്രാര്‍ത്ഥനയോടെ കഴിയുകയായിരുന്നു. ഷാനവാസിന്റൈ സുഹൃത്തുക്കള്‍ വിശുദ്ധ മാസത്തിലെ പ്രത്യേക പ്രാര്‍ഥനകള്‍ക്കൊപ്പം അന്നദാനവും ദേവാലയങ്ങളില്‍ വിശേഷ പ്രാര്‍ഥനകളും നടത്തി. എന്നാല്‍ ഈ പ്രര്‍ത്ഥനകള്‍ ഒന്നും ഫലം കണ്ടില്ല. ബുധനാഴ്ച രാത്രിയോടെ ഷാനവാസിന്റെ മരണ വാര്‍ത്ത എത്തി. എന്നാല്‍ ആ സങ്കട വാര്‍ത്ത ഉള്‍ക്കൊള്ളാനോ വിശ്വസിക്കാനോ കകുടുംബക്കാര്‍ക്കും നാട്ടുകാര്‍ക്കും സുഹൃത്തുക്കള്‍ക്കുമായില്ല.

ഷാനവാസിന്റെ ഉമ്മ ആറ് മാസം മുമ്പാണ് മരിച്ചത്. എന്നാല്‍ അപ്പോള്‍ ഷാനവാസിന് എത്തിച്ചേരാന്‍ സാധിച്ചിരുന്നില്ല. തുടര്‍ന്ന് അവധിക്ക് നാട്ടിലെത്തിയ ശേഷം മാര്‍ച്ച് ഏഴിന് ആണ് മടങ്ങിയത്. ഈ സമയം രണ്ട് മാസത്തെ സേവനത്തിന് ശേഷം ലഡാക്കില്‍ നിന്നും മടങ്ങുമെന്നും സഹോദരിയുടെ മകളുടെ വിവാഹത്തിനായി കുറച്ചുനാള്‍ നീട്ടില്‍ തങ്ങാമെന്നും ഷാനവാസ് ബന്ധുക്കളോട് പറഞ്ഞിരുന്നു. ഭൗതിക ശരീരം എപ്പോള്‍ നാട്ടിലെത്തുമെന്ന് ഉറപ്പാകാത്ത സാഹചര്യത്തില്‍ കബറടക്ക സമയം നിശ്ചയിച്ചിട്ടില്ല.