ബോട്ട് അപകടം അന്വേഷിക്കാൻ പ്രത്യേക അന്വേഷണ സംഘം, ഉത്തരവിട്ട് അനിൽ കാന്ത്

മലപ്പുറം: താനൂരിലെ ബോട്ട് അപകടം അന്വേഷിക്കാൻ പ്രത്യേക അന്വേഷണസംഘത്തെ നിയോഗിച്ച് സംസ്ഥാന പോലീസ് മേധാവി അനിൽ കാന്ത്. മലപ്പുറം ജില്ലാ പോലീസ് മേധാവി സുജിത് ദാസ്.എസ് ആണ് അന്വേഷണസംഘത്തിന്റെ തലവൻ. താനൂർ ഡിവൈ.എസ്.പി വി.വി.ബെന്നിയാണ് അന്വേഷണ ഉദ്യോഗസ്ഥൻ.
കോണ്ടോട്ടി എ.എസ്.പി വിജയ ഭാരത് റെഡ്ഡി, താനൂർ സ്റ്റേഷൻ ഹൗസ് ഓഫീസർ ജീവൻ ജോർജ് എന്നിവർ അംഗങ്ങളാണ്. ഉത്തരമേഖലാ ഐ.ജി നീരജ് കുമാർ ഗുപ്തയുടെ നേരിട്ടുള്ള മേൽനോട്ടത്തിലായിരിക്കും അന്വേഷണം. സംഭവത്തിൽ എത്രയും വേഗം അന്വേഷണം പൂർത്തിയാക്കി റിപ്പോർട്ട് സമർപ്പിക്കാനാണ് നിർദേശം.

22 പേരുടെ മരണത്തിനിടയാക്കിയ താനൂരിലെ ബോട്ട് അപകടം മെയ് ഏഴിന് രാത്രി 7 മണിയോടെയാണ് ഉണ്ടായത്. മരിച്ചവരിൽ ഏറെയും കുട്ടികളായിരുന്നു. 15 കുട്ടികളും അഞ്ച് സ്ത്രീകളും രണ്ട് പുരുഷൻമാരും ആണ് മരിച്ചത്. അന്വേഷണത്തിന്റെ ഭാഗമായി പോലീസ് സംഘം ബോട്ട് വിശദമായി പരിശോധിക്കുന്നുണ്ട്. ദുരന്തമുണ്ടായ പൂരപ്പുഴ അഴിമുഖത്ത് ഇന്നും തിരച്ചിൽ തുടരുകയാണ്. ബോട്ടിൽ ഉണ്ടായിരുന്നവരെ കുറിച്ച് കൃത്യമായ എണ്ണം ഇല്ലാത്തതിനാലാണ് തിരച്ചിൽ തുടരുന്നത്.

അതേസമയം ബോട്ടിന്റെ ഉടമ നാസറിനെതിരെ പോലീസ് കൊലക്കുറ്റം ചുമത്തി. അപകടത്തിന് സാധ്യതയുണ്ടെന്ന് അറിഞ്ഞിട്ടും ബോട്ട് സര്‍വീസ് നടത്തിയ കുറ്റത്തിനാണ് നാസറിനെതിരെ കൊലക്കുറ്റം ചുമത്തിയത്. ബോട്ട് ഓടിച്ച ദിനേശിനും മറ്റ് ജീവനക്കാര്‍ക്കുമായിട്ടുള്ള അന്വേഷണം നടന്ന് വരുകയാണ്. പോലീസ് നാസറിനെ ചോദ്യം ചെയ്തു വരുകയാണ്.