ആര്‍ എസ് എസ് ശാഖയില്‍ പോയിട്ടില്ല, അക്കാലത്ത് താനൊരു മണ്ടനായിരുന്നു, ശ്രീനിവാസന്‍ പറയുന്നു

മലയാളികളുടെ പ്രിയപ്പെട്ട നടനും തിരക്കഥാകൃത്തുമാണ് ശ്രീനിവാസന്‍. ഇപ്പോള്‍ ഒരു മാധ്യമത്തോട് അദ്ദേഹം പറഞ്ഞ വാക്കുകളാണ് സോഷ്യല്‍ മീഡിയകളില്‍ വൈറല്‍ ആകുന്നത്. താന്‍ ആര്‍എസ്എസ് ശാഖയില്‍ പോയിട്ടില്ലെന്ന് ശ്രീനിവാസന്‍ പറഞ്ഞു. ‘അംബേദ്കറൈറ്റ് മുസ്‌ലിം ജീവിതം പോരാട്ടം’ എന്ന പുസ്തകത്തില്‍ വി. പ്രഭാകരന്‍ എഴുതിയത് അസത്യമാണെന്നും അദ്ദേഹം പറഞ്ഞു. പഠിക്കുന്ന കാലത്ത് താന്‍ എ.ബി.വി.പി പ്രവര്‍ത്തകനായിരുന്നെന്ന് പി. ജയരാജന്‍ ആരോപണം ഉന്നയിച്ചപ്പോള്‍ ഇക്കാര്യത്തില്‍ മറുപടി നല്‍കിയതാണ്.

എന്നാല്‍ 1968ല്‍ മട്ടന്നൂര്‍ പഴശ്ശിരാജ എന്‍ എസ് എസ് കോളജില്‍ ഡിഗ്രിക്ക് പഠിച്ചിരുന്ന സമയം ശ്രീനി ആര്‍ എസ് എസ് ശാഖയില്‍ പോയിരുന്നു എന്നാണ് പ്രഭാകര്‍ പറഞ്ഞത്. ‘അന്ന് ആര്‍.എസ്.എസ് നിശ്ശബ്ദ പ്രവര്‍ത്തനമായിരുന്നു. ബന്ധുവീട്ടില്‍ തങ്ങിയാണ് ശാഖയില്‍ പോയത്’ പ്രഭാകരന്‍ പറയുന്നു.

എന്നാല്‍, മട്ടന്നൂര്‍ കോളജില്‍ പഠിക്കുന്ന കാലത്ത് താനടക്കം ആര്‍ക്കും രാഷ്ട്രീയത്തിന്റെ മണ്ണാങ്കട്ടയറിയില്ല. അക്കാലത്ത് താനൊരു മണ്ടനായിരുന്നു. കൂട്ടുകാര്‍ പറയുന്നതനുസരിച്ച് ചാടിക്കളിച്ച കാലമാണത്. ഇഷ്ടമുള്ള ആളുകള്‍ കെ.എസ്.യുവില്‍ ഉണ്ടായിരുന്നു. അപ്പോള്‍ അവരോടൊപ്പം കെ.എസ്.യുക്കാരനായി. അതുപോലെ എസ്.എഫ്.ഐ, എ.ബി.വി.പി തുടങ്ങിയ വിദ്യാര്‍ഥി സംഘടനകളിലും പോയി. അതെല്ലാം ഭയങ്കര രാഷ്ട്രീയമാണെന്ന് പറയുന്നവര്‍ക്ക് വട്ടാണ്. അഴിമതിക്കുള്ള പ്ലാറ്റ്‌ഫോമാണ് ഇന്നത്തെ രാഷ്ട്രീയം. പാര്‍ട്ടി അനുഭാവികള്‍ക്കെല്ലാം സര്‍ക്കാര്‍ ജോലി കൊടുക്കാനാണ് ഇപ്പോഴത്തെ രാഷ്ട്രീയ പ്രവര്‍ത്തനം.- ശ്രീനിവാസന്‍ പറഞ്ഞു.