മാലിന്യനിർമാർജ്ജനം, തദ്ദേശസ്വയംഭരണ വകുപ്പിന്റെ അനാസ്ഥയിൽ സംസ്ഥാനത്തിന് നഷ്ടമായത് കേന്ദ്രം അനുവധിച്ച 46 കോടി

തിരുവനന്തപുരം: തദ്ദേശവകുപ്പിന്റെ അനാസ്ഥ കാരണം നഗര മാലിന്യനിർമാർജ്ജനത്തിൽ കേരളത്തിന് നഷ്ടമായത് കേന്ദ്ര ധനസഹായമായ 46 കോടി. യഥാസമയം ഡിപിആറും സമഗ്രറിപ്പോർട്ടും സമർപ്പിക്കാത്തതിലാണ് കേന്ദ്ര ധനസഹായം നഷ്ടമായത്. കൂടാതെ സംസ്ഥാനത്തെ നഗരങ്ങളിലെ പ്ലാസ്റ്റിക് മാലിന്യങ്ങളുടെ അളവ് കണ്ടെത്താനായിട്ടുള്ള സർവ്വേയും നടത്തിയിട്ടില്ല. തദ്ദേശ മേഖലകളിലെ മാലിന്യ പരിപാലനത്തെ കുറിച്ചുള്ള കൺട്രോളർ ആന്റ് ഓഡിറ്റർ ജനറലിന്റെ റിപ്പോർട്ടിലാണ് ഗുരുതര ആരോപണങ്ങൾ ഉള്ളത്.

മാലിന്യ സംസ്‌കരണവുമായി ബന്ധപ്പെട്ട ഡിപിആറുകൾ തയ്യാറാക്കാത്തതിനാലും യഥാസമയം സമർപ്പിക്കാത്തതിനാലും സംസ്ഥാനത്തെ 11 നഗരങ്ങളിലെ മാലിന്യസംസ്‌കരണ പദ്ധതികൾക്കായി കേന്ദ്രസർക്കാർ കരുതിവെച്ച 45.82 കോടി രൂപയാണ് കേരളം നഷ്ടപ്പെടുത്തിയത്. മാലിന്യ നിർമാർജ്ജനത്തിൽ തദ്ദേശസ്വയംഭരണ വകുപ്പ് കൊണ്ടുവരുന്ന പദ്ധതികൾ പലതും പര്യാപ്തമായിരുന്നില്ല എന്നും കണ്ടെത്തിയിട്ടുണ്ട്.

കേന്ദ്രസർക്കാരിന്റെ സ്വച്ഛ് ഭാരത് മിഷൻ പ്രകാരം പല പദ്ധതികളും 2014 മുതൽ കേന്ദ്രം സംസ്ഥാനത്ത് നടപ്പിലാക്കാൻ നിർദ്ദേശിച്ചു. ഇതിനായി വിശദമായ പഠന റിപ്പോർട്ടുകളും ആവശ്യപ്പെട്ടിരുന്നു. എന്നാൽ കേന്ദ്രത്തിന്റെ നിർദ്ദേശം ലഭിച്ച നാലുവർഷം പിന്നിട്ടതിന് ശേഷം 2018-ലാണ് സംസ്ഥാന സർക്കാർ സ്വച്ഛ് ഭാരത് മിഷനിലൂടെ പഠനം എങ്കിലും നടത്താൻ തയ്യാറായത്. തുടർന്ന് 57 ഡിപിആറുകൾക്ക് കേന്ദ്രം അനുമതി നൽകി. കെടുകാര്യസ്ഥത മൂലം പദ്ധതി നടപ്പിലാക്കാൻ മൂന്നുവർഷം വൈകിയെന്നാണ് സിഎജിയുടെ കണ്ടെത്തൽ.