ഹൗസ് ബോട്ട് സമരത്തിൽ പങ്കെടുത്തില്ലെങ്കിൽ കല്ലേറ്; സിഐടിയു പ്രവർത്തകരുടെ ശബ്ദ സന്ദേശം

ആലപ്പുഴ. ശനിയാഴ്ച നടക്കാനിരിക്കുന്ന ഹൗസ് ബോട്ട് സമരത്തിൽ പങ്കെടുക്കാത്തവരെ നേരിടാൻ സിഐടിയു ആഹ്വാനം. അക്രമസമരത്തിന് പദ്ധതിയിടുന്ന ശബ്ദസന്ദേശങ്ങൾ പുറത്തുവന്നു. സമരത്തിൽ പങ്കെടുക്കാത്തവരെ കൈകാര്യം ചെയ്യുമെന്നും സന്ദേശങ്ങളിൽ പറയുന്നുണ്ട്. സമരത്തിൽ പങ്കെടുക്കാതെ ബോട്ടിറക്കിയാൽ ബോട്ടിന് നേരെ കല്ലേറുണ്ടാകുമെന്നും തൊഴിലാളികളെ കൈയ്യേറ്റം ചെയ്യുമെന്നുമാണ് ശബ്ദസന്ദശത്തിൽ പറയുന്നത്.

ഓടാൻ പാടില്ലെന്ന് പാർട്ടി പറഞ്ഞിട്ടുണ്ടെങ്കിൽ അത് വ്യക്തമാണ്. ഇതിനെതിരെ പ്രവർത്തിക്കുന്നവരെ മാറ്റിനിർത്തി കൈകാര്യം ചെയ്യണമെന്നും സിഐടിയു പ്രവർത്തകരുടെ വാട്‌സപ്പ് ഗ്രൂപ്പുകളിൽ പ്രചരിക്കുന്ന സന്ദേശങ്ങളിൽ പറയുന്നു. ഹൗസ് ബോട്ട് വർക്കേഴ്‌സ് യൂണിയൻ അത്തരത്തിലൊരു തീരുമാനവും എടുത്തിട്ടില്ലെന്നാണ് സിഐടിയു നേതാവ് സികെ സദാശിവന്റെ പ്രതികരണം.

മറ്റുള്ളവർ പറയുന്നതിന്റെ ഉത്തരവാദിത്വം ഏറ്റെടുക്കാൻ തങ്ങൾ തയ്യാറല്ലെന്നും അദ്ദേഹം കൂട്ടിച്ചേർത്തു. വേതനവർധനവ് ആവശ്യപ്പെട്ടാണ് ശനിയാഴ്ച യൂണിയൻ സമരത്തിന് ആഹ്വാനം ചെയ്തിരിക്കുന്നത്. നിലവിൽ 12000 രൂപയാണ് തൊഴിലാളികളുടെ മാസവരുമാനം. പ്രതിദിന ബാറ്റ 290 രൂപയാണ്.

ഇത് 18000 രൂപയെങ്കിലുമായി വർധിപ്പിക്കണമെന്നാണ് തൊഴിലാളികളുടെ ആവശ്യം. 10 ശതമാനം വരെ വേതനവർധനവിന് ഹൗസ് ബോട്ട് ഉടമകൾ തയ്യാറാണെങ്കിലും 50 ശതമാനം വർധനവ് എന്നതാണ് യൂണിയന്റെ ആവശ്യം. സമരം ഒത്തുതീർപ്പാക്കാനുള്ള ചർച്ച ഹൗസ് ബോട്ട് ഉടമകളും തൊഴിലാളികളും തമ്മിൽ വെള്ളിയാഴ്ച നടക്കും.