വഴിവിളക്കുകളില്ലാത്ത റോഡില്‍ യാത്രക്കാര്‍ കണ്ട അജ്ഞാത രൂപം; വൈറലാകുന്ന വീഡിയോ

വഴിവിളക്കുകളില്ലാത്ത റോഡില്‍ യാത്രക്കാര്‍ കണ്ട അജ്ഞാത രൂപത്തെക്കുറിച്ചുള്ള വാര്‍ത്തകളാണ് കഴിഞ്ഞ കുറച്ച് ദിവസങ്ങളായി സോഷ്യല്‍മീഡിയയില്‍ പ്രചരിക്കുന്നത്. ഇരുട്ടിന്റെ മറപറ്റി റോഡരികിലൂടെ നടന്നുപോകുന്ന ഒരു രൂപം. വഴിവിളക്കുകള്‍ ഇല്ലാത്തതിനാല്‍ ഇത് എന്താണെന്നോ ആരാണെന്നോ മനസ്സിലാക്കാനും സാധിക്കില്ല. വാഹനങ്ങളുടെ വെളിച്ചമടിക്കുന്ന സമയത്ത് മാത്രം മിന്നായം പോലെ ഒരു രൂപം വ്യക്തമാകും. വഴിയരികില്‍ കണ്ട ഈ അജ്ഞാത രൂപത്തിന്റെ വീഡിയോയും സോഷ്യല്‍മീഡിയയില്‍ വൈറലാകുന്നുണ്ട്.

മെല്ലെ നടന്നുപോകുന്ന രൂപം വാഹനത്തിന്റെ ലൈറ്റടിക്കുന്ന സമയത്ത് മെല്ലെ തിരിഞ്ഞുനോക്കുന്നിടത്താണ് വീഡിയോ അവസാനിക്കുന്നത്. എന്നാല്‍ അപ്പോഴും രൂപം വ്യക്തമല്ല. പലരും ഈ കാഴ്ച കണ്ടതോടെ ഇത് സംബന്ധിച്ച് ഊഹാപോഹങ്ങളും കെട്ടുകഥകളും പുറത്തുവന്നുതുടങ്ങി. രൂപം വ്യക്തമല്ലാത്തതിനാല്‍ വീഡിയോ കണ്ട പലരും അത് അന്യഗ്രഹ ജീവിയാണെന്നും ദൂരെ കാണുന്ന വെളിച്ചം പറക്കും തളികയാണെന്നും കഥകളിറക്കി. ചില രസികന്മാര്‍ നാസയെ ടാഗ് ചെയ്യുക വരെ ചെയ്തു.

എന്നാല്‍ സംഭവം അത്ര പേടിക്കാനൊന്നുമില്ലെന്ന് പറഞ്ഞ് വീഡിയോ പകര്‍ത്തിയ ചെറുപ്പക്കാര്‍ തന്നെ രംഗത്തെത്തിയിരിക്കുകയാണ്. പ്രാദേശിക ചാനലിലാണ് ഇവര്‍ ഇക്കാര്യത്തില്‍ സസ്പെന്‍സ് പുറത്തുവിട്ടത്. നഗ്‌നയായ ഒരു സ്ത്രീയായിരുന്നു നടന്നുപോയത്. ഇതിന്റെ ഒന്നര മിനിട്ട് നീണ്ട വീഡിയോ തങ്ങളുടെ പക്കലുണ്ടെന്ന് രംഗം ചിത്രീകരിച്ച ദീപക് പറയുന്നു. ജാര്‍ഖണ്ഡിലാണ് ഈ സംഭവം.

ആദ്യം കാഴ്ച കണ്ട് ഭയന്നെങ്കിലും തിരികെ വന്ന് രംഗം ചിത്രീകരിക്കുകയായിരുന്നു. എന്നാല്‍ പിന്നീട് സ്ത്രീ ഇവിടെ നിന്നും നടന്നുപോയി. സ്ഥലത്തെ പൊലീസും അതൊരു വനിതയായിരുന്നെന്നും സംഭവത്തിന് പിന്നിലെ വസ്തുതകള്‍ അന്വേഷിക്കുകയാണെന്നും അറിയിച്ചു.