തെരുവ് നായ ആക്രമണം വീണ്ടും; കാട്ടാക്കടയിലും ഉപ്പുതറയിലുമായി 9 പേർക്ക് തെരുവുനായയുടെ കടിയേറ്റു.

തിരുവനന്തപുരം. തെരുവ് നായകളുടെ ആക്രമണവും, പിറകെ പേ വിഷബാധയേറ്റുള്ള 21 മരണങ്ങളും നടന്ന കേരളത്തിൽ തെരുവ് നായയുടെ ആക്രമണം തുടർക്കഥയാവുകയാണ്. തെരുവ് നായയുടെ ആക്രമണം ഉണ്ടായ കാട്ടാക്കടയിൽ രണ്ടു കുട്ടികൾ അടക്കം നാലുപേർക്ക് തെരുവ് നായകളുടെ കടിയേറ്റു.

ആമച്ചൽ,​ പ്ലാവൂർ എന്നിവിടങ്ങളിലാണ് തെരുവ് നായയുടെ ആക്രമണം ഉണ്ടായിരിക്കുന്നത്. കട്ടപ്പന ഉപ്പുതറയിൽ വിദ്യാർഥിയടക്കം 5 പേർക്കാണ് തെരുവുനായയുടെ കടിയേറ്റത്. ഉപ്പുതറയിൽ കണ്ണംപടി ആദിവാസി മേഖലയിൽ വൈകിട്ട് അഞ്ചോടെയാണ് സംഭവം. പരുക്കേറ്റവരെ കട്ടപ്പന താലൂക്കാശുപത്രിയിൽ പ്രവേശിപ്പിച്ചിരിക്കുകയാണ്.

കാട്ടാക്കടയിൽ ബസ് കാത്തു നിന്ന രണ്ടു കുട്ടികൾക്കും ബസിറങ്ങുകയായിരുന്ന ഒരു യുവതിക്കും കുട്ടിക്കുമാണ് നായയുടെ കടിയേറ്റത്. നാട്ടുകാർ വിരട്ടി ഓടിക്കുന്നതിനിടെയാണ് ബസിറങ്ങുന്നവരെ നായ ആക്രമിക്കുന്നത്. കടിയേറ്റവരെ പ്രാഥമിക ചികിത്സയ്ക്കായി കാട്ടാക്കട,​ നെയ്യാറ്റിൻകര ആശുപത്രിയിൽ എത്തിച്ചിരിക്കുകയാണ്.

ഒരാളെ വിദഗ്ദ്ധ ചികിത്സയ്ക്കായി മെഡിക്കൽ കോളേജിലേക്ക് മാറ്റിയിട്ടുണ്ട്. കഴിഞ്ഞ ദിവസം ഒറ്റപ്പാലത്തും സമാനരീതിിയിൽ പന്ത്രണ്ടുകാരന് തെരുവ് നായയുടെ കടിയേറ്റിരുന്നു,​ വരോട് അത്താണിയിൽ മനാഫിനെയാണ് നായ കടിക്കുന്നത്. പ്രദേശത്ത് രണ്ടുപേർക്ക് കൂടി വേറെ കടിയേറ്റിട്ടുണ്ട്. തെരുവ് നായയുടെ ആക്രമണം സംസ്ഥാനത്ത് ഓരോ ദിവസവും വർധിച്ചു വരുന്നതായ റിപ്പോർട്ടുകളാണ് പുറത്ത് വന്നു കൊണ്ടിരിക്കുന്നത്.