സ്പെല്ലിംഗ് തെറ്റാണ്, പക്ഷേ, വിവാഹ വാർഷികത്തിന് അല്ലി നൽകിയ സമ്മാനത്തെക്കുറിച്ച് സുപ്രിയ

പൃഥ്വിരാജിൻറെയും സുപ്രിയയുടെയും പോസ്റ്റുകളിലൂടെ സിനിമാപ്രേമികൾക്ക് ഏറെ പരിചിതയാണ് മകൾ അല്ലി എന്നു വിളിക്കുന്ന അലംകൃത. തങ്ങളുടെ വിവാഹ വാർഷികത്തിന് മകൾ നൽകിയ ഒരു സമ്മാനത്തെക്കുറിച്ച് പറയുകയാണ് സുപ്രിയ.

സ്വന്തമായി വരച്ച ഒരു ചിത്രത്തിൽ അച്ഛനമ്മമാർക്ക് വിവാഹ വാർഷിക ആശംസകൾ നേർന്നിരിക്കുകയാണ് അലംകൃത. അച്ഛനും അമ്മയും താനും അടങ്ങുന്ന മൂന്നംഗ കുടുംബത്തെയാണ് അല്ലി ചിത്രത്തിൽ ആക്കിയിരിക്കുന്നത്. എന്നാൽ ഹാപ്പി വെഡ്ഡിംഗ് ആനിവേഴ്സറി എന്ന് ഇംഗ്ലീഷിൽ എഴുതിയതിൽ ഒരു അക്ഷരത്തെറ്റ് കടന്നുകൂടിയിട്ടുണ്ട്. anniversary എന്നതിനു പകരം aniverseriy എന്നാണ് അല്ലി എഴുതിയത്. സ്പെല്ലിംഗിൽ തെറ്റുണ്ടെങ്കിലും അവൾ പങ്കുവച്ച വികാരം ശരിയായതാണെന്ന് സുപ്രിയയുടെ വിലയിരുത്തൽ. പോസ്റ്റിനു താഴെയുള്ള ആരാധകരുടെ കമൻറുകളും ഇതേ അഭിപ്രായത്തോടെയുള്ളവയാണ്. ആ കാർഡ് സ്നേഹത്താൽ നിറയുമ്പോൾ സ്പെല്ലിംഗ് ആരാണ് ശ്രദ്ധിക്കുകയെന്നാണ് കമൻറുകളിൽ ഒന്ന്.

വർഷങ്ങളോളം പ്രണയിച്ച ശേഷം വിവാഹിതരായവരാണ് പൃഥ്വിയും സുപ്രിയയും. 2011ൽ ആയിരുന്നു വിവാഹം. വിവാഹശേഷം മാധ്യമപ്രവർത്തനത്തിൽ നിന്നും വിട്ടുനിൽക്കുന്ന സുപ്രിയ ഇപ്പോൾ പൃഥ്വിരാജ് പ്രൊഡക്ഷൻസിലൂടെ നിർമാതാവായും മാറിയിരിക്കുകയാണ്. പതിനൊന്നാം വിവാഹ വാർഷികം ആയിരുന്നു കഴിഞ്ഞ ദിവസം.

ലൂസിഫറിനു ശേഷം സംവിധാനം ചെയ്‍ത ബ്രോ ഡാഡിയാണ് പൃഥ്വിരാജിൻറേതായി അവസാനം പ്രേക്ഷകരിലേക്ക് എത്തിയ ചിത്രം. ഡിജോ ജോസ് ആൻറണിയുടെ ജനഗണമന, ഷാജി കൈലാസിൻറെ കടുവ, അൽഫോൻസ് പുത്രൻറെ ഗോൾഡ്, രതീഷ് അമ്പാട്ടിൻറെ തീർപ്പ്, ബ്ലെസിയുടെ ആടുജീവിതം, വേണുവിൻറെ കാപ്പ, ജയൻ നമ്പ്യാരുടെ വിലായത്ത് ബുദ്ധ എന്നിവയ്ക്കൊപ്പം സംവിധാനം ചെയ്യുന്ന എമ്പുരാനും പൃഥ്വിരാജിന് പൂർത്തിയാക്കാനുണ്ട്. സംവിധാന അരങ്ങേറ്റമായിരുന്ന ലൂസിഫറിൻറെ സീക്വൽ ആണ് ഇത്.