നോമ്പ് മുറിക്കേണ്ട സമയമായാൽ പള്ളിയിൽ കൊണ്ടുവിട്ട് നിസ്‌കരിച്ചിട്ട് വരാൻ പറയും, സുരേഷ് ഗോപിയുടെ ഡ്രൈവർ

തൃശൂരിലെ എൻഡിഎ സ്ഥാനാർത്ഥിയും നടനുമായ സുരേഷ് ഗോപിയെക്കുറിച്ച് അദ്ദേഹത്തിന്റെ ഡ്രൈവർ ഷെമീർ പറഞ്ഞ വാക്കുകൾ ഇപ്പോൾ സോഷ്യൽ മീഡിയയിൽ വൈറലാവുകയാണ്. സുരേഷ് ഗോപി പച്ചയായ മനുഷ്യനാണെന്നും ശുദ്ധമനസ്സുള്ളയാളാണെന്നും ഷെമീർ പറയുന്നു. നോമ്പുകാലത്ത് തനിക്ക് ഉണ്ടാകാറുളള അനുഭവവും ഷെമീർ പങ്കുവെയ്ക്കുന്നുണ്ട്.

“രാഷ്ട്രീയത്തിലേക്കൊക്കെ സാർ വരുന്നതിനു മുൻപ് തന്നെ ഞാൻ അദ്ദേഹത്തിനൊപ്പം ആണ്. അദ്ദേഹം പാവങ്ങൾക്ക് വേണ്ടി എവിടെ എന്ത് കണ്ടാലും കയറി ഇടപെടുന്ന ആളാണ്. ദൂരയാത്രകൾ ചെയ്യുമ്പോൾ നോമ്പ് സമയത്ത് ഞാൻ നോമ്പാണെങ്കിൽ ഏതെങ്കിലും പള്ളി കാണുമ്പോൾ അദ്ദേഹം എന്നോട് പള്ളിക്കകത്തേക്ക് കയറ്റാൻ പറയും. എന്നെ പള്ളിയിൽ കയറ്റി നോമ്പു മുറിപ്പിക്കുകയും ഏറ്റവും അടുത്തുള്ള ഹോട്ടലിൽ കയറ്റി ഭക്ഷണം വാങ്ങി കഴിപ്പിക്കുകയും ചെയ്തതിനു ശേഷമേ പിന്നെ യാത്ര തുടരുകയുള്ളൂ.

അതുപോലെതന്നെ നിസ്കരിക്കാനുള്ള സമയവും സൗകര്യവും സാർ എനിക്ക് ചെയ്തു തരാറുണ്ട്. എല്ലാവരോടും നല്ല ആദരവ് ആണ്.പക്ഷെ തെറ്റ് കണ്ടാൽ ആരാണെങ്കിലും സർ ഇടപെടും. പണ്ടുമുതലേ നല്ല പ്രവർത്തനം ആണ്. ഒരുപാട് തിരക്കുള്ള സമയത്ത് പോലും സാർ എന്റെ കല്യാണത്തിന് വരികയും എന്റെ കുഞ്ഞ് ജനിച്ചപ്പോൾ വരികയും ഒക്കെ ചെയ്തിട്ടുണ്ട്. ഒരുപാട് സഹായങ്ങൾ ചെയ്യുന്ന പച്ചയായ മനുഷ്യൻ ആണ്. രാഷ്ട്രീയത്തിൽ ഒരുപാട് ശത്രുക്കൾ ഉണ്ട് സാറിന്. എല്ലാവർക്കും ഭരണം വേണം, അതാണ് രാഷ്ട്രീയം. പക്ഷെ സാറിന് ആ രാഷ്ട്രീയം അറിയില്ല. ശുദ്ധ മനസ്കൻ ആണ്.