ബാങ്ക് ബാധ്യത മൂലം ബുദ്ധിമുട്ടിയിരുന്ന മുത്തുകുമാരിക്ക് സഹായവുമായി സുരേഷ് ഗോപി

ബാങ്ക് വായ്പ മൂലം ബുദ്ധിമുട്ടിയിരുന്ന മുത്തു കുമാരിയുടെ ബാങ്ക് ബാധ്യത അടച്ച് തീര്‍ത്ത് സുരേഷ് ഗോപി. മുമ്പ് സുരേഷ് ഗോപി കരുവന്നൂര്‍ ബാങ്ക് പീഡനം അനുഭവിച്ചിരുന്ന വരുടെയും കടങ്ങള്‍ ഏറ്റെടുത്തിരുന്നു. മുമ്പും കട ബാധ്യത മൂലം കഷ്ടപ്പെട്ടിരുന്ന പലരെയും സുരേഷ് ഗോപി സഹായിച്ചിട്ടുണ്ട്. ഇപ്പോള്‍ മുത്തുകുമാരിയുടെ 1.90 ലക്ഷം രൂപയുടെ കടക്കെണിയ്ക്കാണ് സുരേഷ് ഗോപി പരിഹാരം കണ്ടെത്തിയിരിക്കുന്നത്. രാമസിംഹന്‍ അബൂബക്കറാണ് ഫെയ്‌സ്ബുക്കിലൂടെ ഇക്കാര്യം അറിയിച്ചിരിക്കുന്നത്.

രാമസിംഹന്‍ അബൂബക്കറിന്റെ ഫെയ്‌സ്ബുക്ക് കുറിപ്പിന്റെ പൂര്‍ണരൂപം

മുത്തു കുമാരിക്ക് വേണ്ടി നിങ്ങളോട് സഹായം ആവശ്യപ്പെട്ടത് പോലെ ശ്രീ, സുരേഷ്‌ഗോപിയോടും ഞാനവർക്ക് വേണ്ടി സഹായം അഭ്യർത്ഥിച്ചിരുന്നു. ആ അഭ്യർത്ഥന അദ്ദേഹം കേട്ടു. മുത്തുകുമാരിയുടെ ഒരു വലിയ ബാധ്യത അദ്ദേഹം ഏറ്റെടുത്തു എന്നറിയിക്കുന്നതിൽ അതിയായ സന്തോഷമുണ്ട്…

193948 രൂപയുടെ ബാങ്ക് ബാധ്യത സുരേഷ് ഗോപി അടച്ചു തീർത്തു.. നാം പാതി ദൈവം പാതി എന്നാണല്ലോ അതിൽ ദൈവത്തിന്റെ സ്ഥാനം അദ്ദേഹം ഏറ്റെടുത്തു. പൊതു സമൂഹത്തിൽ നിന്നും ചെറുതല്ലാത്ത സഹായം വന്നിട്ടുണ്ട് പുറകേ അതിന്റെ കണക്കും നൽകാം.
കുടുംബം കടക്കാരാവുന്നത് പലപ്പോഴും ഉറ്റവർക്ക് രോഗം വരുമ്പോഴാണ്, മുത്തുകുമാരിക്കും സംഭവിച്ചത് അത് തന്നെയാണ്, പണയവും ബ്ലേഡുമായി ജീവിതം കുരുങ്ങും, ചിലർ കുരുക്കവസാനിപ്പിക്കാൻ ജീവിതം അവസാനിപ്പിക്കും.

ജാഗ്രതയുള്ള ഒരു സമൂഹവും, സുരേഷ് ഗോപിയെപ്പോലുള്ള വ്യക്തിത്വങ്ങളും ഒത്തു ചേർന്നാൽ ഒരുപാട് ജീവിതങ്ങൾ രക്ഷപ്പെടുത്താനാവും. ഒരിക്കൽ കൂടി പ്രിയ സഹോദരൻ സുരേഷ് ഗോപിക്ക് നന്ദി പറയുന്നു.