സുഷമ സ്വരാജ് വെള്ളം കുടിക്കുമോ?

ഇന്ത്യൻ വിദേശകാര്യ മന്ത്രി സുഷമാ സ്വരാജിനെ ബഹ്‌റൈനിൽ കാത്തിരിക്കുന്നത് പ്രവാസികളുടെ പരാതിപ്പെരുമഴ. രണ്ടു ദിവസത്തെ സന്ദർശനത്തിയാണ് സുഷമ ബഹറിനിൽ എത്തുന്നത് എന്നാൽ പല പരാതികളും ജലരേഖയായി അവശേഷിക്കുന്നതിനാൽ പരാതികൾക്ക് പരിഹാരം നൽകാൻ സുഷമയ്ക്ക് ആകുമെന്ന പ്രതീക്ഷയിലാണ് പ്രവാസികൾ. നിലവിൽ പ്രവാസികളുടെ ജീവിത ചിലവുകൾ സാരമായി ബാധിച്ചിരിക്കുന്ന വൈദ്യുതി ചാർജ്ജിന്റെ കാര്യത്തിൽ ബഹ്‌റൈൻ ഭരണാധികാരികളുമായി നേരിട്ട് ചർച്ച നടത്തണമെന്ന ആവശ്യമാണ് ഒട്ടുമിക്ക പ്രവാസികൾക്കും മന്ത്രിയുടെ മുൻപിൽ വയ്ക്കാനുള്ളത്. മുൻപ് തീരുമാനിക്കപ്പെട്ട ജയിൽ മാറ്റം സംബന്ധിച്ചും വിമാന നിരക്ക് വർദ്ധനവ് തുടങ്ങിയവ സംബന്ധിച്ചും പ്രവാസികൾക്ക് പരാതികളുണ്ട്. മാത്രമല്ല പ്രവാസികൾ നിരന്തരം ആവശ്യപ്പെട്ടതും അല്ലാത്തതുമായ നിരവധി പരാതികളാണ് പ്രവാസികൾക്കുള്ളത്. ഇതിനായി സോഷ്യൽ മീഡിയ വഴി പ്രവാസി സമൂഹം നിരന്തരം ചർച്ചയിലാണ്. ശനിയാഴ്ച ബഹ്‌റൈനിൽ എത്തുന്ന മന്ത്രി വൈകുന്നേരം 4 മണിക്ക് ഇന്ത്യൻ എംബസിയുടെ സീഫിലുള്ള പുതിയ കെട്ടിടം ഉദ്ഘാടനം ചെയ്യും. ബഹ്‌റൈൻ വിദേശകാര്യ മന്ത്രി ഷെയ്ഖ് ഖാലിദ് ബിൻ അഹമ്മദ് അൽ ഖലീഫയുമായും സുഷമ ചർച്ച നടത്തും. ബഹ്‌റൈൻ രാജാവ് കിംഗ് ഹമദ് ബിൻ ഇസ അൽ ഖലീഫ, കിരീടാവകാശി ഷെയ്ഖ് സൽമാൻ ബിൻ ഹമദ് അൽ ഖലീഫ, പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫ എന്നിവരുമായും സുഷമ കൂടിക്കാഴ്ച നടത്താനിടയുണ്ടെന്നാണ് റിപ്പോർട്ട്.