നികുതി വെട്ടിപ്പ്, തെലങ്കാന മന്ത്രി സബിത ഇന്ദ്ര റെഡ്ഡിയുടെ ബന്ധുവിന്റെ വസതിയിൽ ആദായനികുതി വകുപ്പിന്റെ പരിശോധന

ഹൈദരാബാദ്: നികുതി വെട്ടിപ്പ് സംബന്ധിച്ച് ലഭിച്ച പരാതിയുടെ അടിസ്ഥാനത്തിൽ തെലങ്കാന വിദ്യാഭ്യാസ മന്ത്രി സബിത ഇന്ദ്ര റെഡ്ഡിയുടെ ബന്ധുവിന്റെ വസതിയിൽ ആദായനികുതി വകുപ്പിന്റെ പരിശോധന. ബന്ധുവായ പ്രദീപിന്റെ ഗച്ചിബൗളിയിലെ വസതിയിലാണ് ഇന്ന് രാവിലെ മുതൽ ആദായനികുതി വകുപ്പ് ഉദ്യോഗസ്ഥർ പരിശോധന നടത്തുന്നത്. തെലങ്കാന നിയമസഭാ തെരഞ്ഞെടുപ്പിന് മുന്നോടിയായിയായണ് ആദായനികുതി വകുപ്പിന്റെ പരിശോധന.

2019 മുതൽ തെലങ്കാനയിലെ വിദ്യാഭ്യാസ മന്ത്രിയാണ് സബിത. 2023ലെ നിയമസഭാ തിരഞ്ഞെടുപ്പിൽ മഹേശ്വരം മണ്ഡലത്തിൽ നിന്നുള്ള ടിആർഎസ് സ്ഥാനാർഥിയാണ് സബിത റെഡ്ഡി. മണ്ഡലത്തിൽ കോൺഗ്രസിന്റെ കിച്ചനഗരി ലക്ഷ്മ റെഡ്ഡി, ബിജെപിയുടെ അന്ദേല ശ്രീരാമുലു യാദവ് എന്നിവരെയാണ് അവർ നേരിടുന്നത്.

ഫാർമസ്യൂട്ടിക്കൽ കമ്പനിയായ ഡോ.റെഡ്ഡീസ് ലാബ്സിലെ ഉദ്യോഗസ്ഥനായ കോട്ല നരേന്ദ്ര റെഡ്ഡിയുടെ വസതി ഉൾപ്പെടെ ഹൈദരാബാദിലെ 15 സ്ഥലങ്ങളിലാണ് ഐടി റെയ്ഡ് നടക്കുന്നത്. നാഗുലപ്പള്ളി, പട്ടേൽഗുഡ, ഗച്ചിബൗളി എന്നിവിടങ്ങളിലെ ഫാർമസ്യൂട്ടിക്കൽ കമ്പനികളുടെ ഡയറക്ടർമാരുടെ വസതികളിലും നികുതി വെട്ടിപ്പ് കണ്ടെത്തിയതിനെ തുടർന്ന് ഉദ്യോഗസ്ഥർ പരിശോധന നടത്തുന്നുവെന്നാണ് റിപ്പോർട്ടുകൾ.

നേരത്തെ നവംബർ 9 ന് തെലങ്കാനയിലെ ഖമ്മം ജില്ലയിലെ കോൺഗ്രസ് നേതാവ് പൊങ്കുലേട്ടി ശ്രീനിവാസ് റെഡ്ഡിയുടെ വസതിയിൽ ആദായനികുതി വകുപ്പ് ഉദ്യോഗസ്ഥർ റെയ്ഡ് നടത്തിയിരുന്നു. നവംബർ 30ന് നടക്കുന്ന തെരഞ്ഞെടുപ്പിൽ ഖമ്മം ജില്ലയിലെ പാലയർ മണ്ഡലത്തിൽ നിന്നാണ് പൊങ്കുലേട്ടി ശ്രീനിവാസ് റെഡ്ഡി മത്സരിക്കുന്നത്.തെലങ്കാനയിൽ നവംബർ 30 ന് നിയമസഭാ തിരഞ്ഞെടുപ്പ് നടക്കും, കൂടാതെ മറ്റ് നാല് സംസ്ഥാനങ്ങളിലെ വോട്ടെണ്ണൽ ഡിസംബർ 3 ന് ഷെഡ്യൂൾ ചെയ്തിട്ടുണ്ട്.