അന്യജാതിക്കാരനെ പ്രണയിച്ചതിന് പിതാവ് കഴുത്തുഞെരിച്ച് കൊന്ന പെൺകുട്ടിയുടെ കാമുകൻ ട്രെയിന് മുന്നിൽ ചാടി ജീവനൊടുക്കി

അന്യജാതിക്കാരനെ പ്രണയിച്ചകുറ്റത്തിന് പിതാവ് കഴുത്തുഞെരിച്ച് കൊലപ്പെടുത്തിയ പെൺകുട്ടിയുടെ കാമുകൻ ട്രെയിന് മുന്നിൽ ചാടി ജീവനൊടുക്കി. കർണാടകയിലെ കോലാറിലാണ് സംഭവം നടന്നത്. കോലാറിലേ ബോഡഗുർക്കി സ്വദേശിനി കീർത്തിയെയാണ് (20) പിതാവ് കൃഷ്ണമുർത്തി കഴുത്ത് ഞെരിച്ച് കൊലപ്പെടുത്തിയിരുന്നത്. പെൺകുട്ടി മരണപെട്ടതറിഞ്ഞു കാമുകനായ ഗംഗാധർ (24) ട്രെയിന് മുന്നിൽ ചാടി ജീവനൊടുക്കുകയാണ് ഉണ്ടായത്.

ദളിത് യുവാവായ ഗംഗാധറും ഗൊല്ല സമുദായത്തിൽപ്പെട്ട കീർത്തിയും പ്രണയത്തിലായിരുന്നു. ഗംഗാധർ കൃഷ്ണമൂർത്തിയോട് മകളെ വിവാഹം ചെയ്ത് നൽകണമെന്ന് ആവശ്യപ്പെട്ടെങ്കിലും അന്യജാതിക്കാരനായതിനാൽ ഈ ബന്ധത്തെ പിതാവ് എതിർക്കുകയാണ് ഉണ്ടായത്. ബന്ധത്തിൽ നിന്ന് പിന്മാറണമെന്നും ഇനി പരസ്പരം കാണരുതെന്നും ഇയാൾ രണ്ടുപേർക്കും മുന്നറിയിപ്പ് നൽകി.

കൃഷ്ണമൂർത്തിയുടെ എതിർപ്പ് അവഗണിച്ച് ഇരുവരും ഇടക്കിടക്ക് രഹസ്യമായി കൂടിക്കാഴ്ച നടത്തി വരുകയായിരുന്നു. കഴിഞ്ഞ ദിവസം ഇക്കാര്യമറിഞ്ഞ പിതാവ് മകളെ കഴുത്ത് ഞെരിച്ച് കൊലപ്പെടുത്തുകയായിരുന്നു. കീർത്തിയെ പിതാവ് കൊന്ന വിവരം പുറത്തറിഞ്ഞതിന് ശേഷം ഗംഗാധറിനെ കാണാതായി. പിന്നീട് റെയിൽവേ ട്രാക്കിൽ മരിച്ചനിലയിൽ മൃതദേഹം കണ്ടെത്തുകയായിരുന്നു.