എട്ടുവയസുകാരിയെ പീഡിപ്പിച്ച കേസ്, ബന്ധുവിന് പ്രതിക്ക് 140 വർഷം കഠിന തടവ്

മലപ്പുറം : പ്രായപൂർത്തിയാകാത്ത പെൺകുട്ടിയെ പീഡനത്തിന് ഇരയാക്കിയ കേസിൽ പ്രതിക്ക് 140 വർഷം കഠിന തടവ് വിധിച്ച് കോടതി. മഞ്ചേരി അതിവേഗ പോക്സോ കോടതിയുടേതാണ് വിധി. അതിജീവിതയുടെ ബന്ധുവാണ് പ്രതി. രണ്ട് വർഷത്തോളമാണ് പ്രതി പെൺകുട്ടിയെ പീഡനത്തിന് ഇരയാക്കിയിത്.

ജഡ്ജി എ.എം അഷറഫിന്റേതാണ് ഉത്തരവ്. ഒമ്പത് വകുപ്പുകളിലായാണ് 140 വർഷത്തെ കഠിന തടവ് വിധിച്ചത്. ഇതിൽ ഏറ്റവും കൂടിയ ശിക്ഷയായ 30 വർഷം തടവ് അനുഭവിച്ചാൽ മതിയാകും. 9,75,000 രൂപ പിഴടക്കാനും കോടതി ഉത്തരവിട്ടിട്ടുണ്ട്. കോട്ടയ്‌ക്കൽ പോലീസ് രജിസ്റ്റർ ചെയ്ത കേസിലാണ് നടപടി.

അതേസമയം,കുറവിലങ്ങാട്(കോട്ടയം) പ്രായപൂര്‍ത്തിയാകാത്ത പെണ്‍കുട്ടിയെ കടന്നുപിടിച്ച കേസില്‍ മധ്യവയസ്‌കനെ പോലീസ് അറസ്റ്റ് ചെയ്തു. കുറവിലങ്ങാട് പള്ളിയമ്പ് ഭാഗത്ത് ഓരത്ത് വീട്ടില്‍ കുഞ്ഞുമോന്‍ എന്ന് വിളിക്കുന്ന ഉലഹന്നാന്‍ വര്‍ക്കി (59)യെയാണ് കുറവിലങ്ങാട് പോലീസ് അറസ്റ്റ് ചെയ്തത്.

ഇയാള്‍ ശനിയാഴ്ച രാവിലെ കുറവിലങ്ങാട് ടൗണില്‍ വഴിയിലൂടെ നടന്നുപോകുകയായിരുന്ന പ്രായപൂര്‍ത്തിയാകാത്ത പെണ്‍കുട്ടിയെ കടന്നുപിടിച്ച് ലൈംഗികാതിക്രമം നടത്തുകയായിരുന്നു. പരാതിയെ തുടര്‍ന്ന് കുറവിലങ്ങാട് പോലീസ് കേസ് രജിസ്റ്റര്‍ ചെയ്യുകയും സ്റ്റേഷന്‍ എസ്.എച്ച്.ഒ. നോബിളിന്റെ നേതൃത്വത്തില്‍ ഇയാളെ അറസ്റ്റ് ചെയ്യുകയുമായിരുന്നു. കോടതിയില്‍ ഹാജരാക്കി റിമാന്‍ഡ് ചെയ്തു.