42 വാഹനങ്ങളുടെ അകമ്പടിയുള്ള മുഖ്യൻ ഇടതുപക്ഷത്തിന്റെ മുഖമല്ലെന്ന് സി പി ഐ

പത്തനംതിട്ട. തിരുവനന്തപുരം ജില്ലാ സമ്മേളനത്തിന് പിറകെ സിപിഐ പത്തനംതിട്ട ജില്ലാ സമ്മേളനത്തിലും മുഖ്യമന്ത്രി പിണറായി വിജയന് രൂക്ഷ വിമര്‍ശനം. സി പി ഐയെ ഘടക കക്ഷിയായി പോലും കാണുന്നില്ല, സര്‍ക്കാരിന്റെ പ്രതിച്ഛായ്ക്ക് മങ്ങലേല്‍ക്കുന്നു, കറുത്ത മാസ്‌കിനോട് ഉള്ള അസഹിഷ്ണുത ജനാധിപത്യമല്ല, എഐഎസ്എഫിനോട് ഫാസിസ്റ്റ് നിലപാടെടുക്കുന്നു, 42 വാഹനങ്ങളുടെ അകമ്പടിയുള്ള മുഖ്യൻ ഇടതുപക്ഷത്തിന്റെ മുഖമല്ല, പിണറായി വിജയന് ആർഭാടം കൂടി, പിണറായി സര്‍ക്കാര്‍ എന്ന ബ്രാൻഡിംഗ് ശരിയല്ല, തുടങ്ങി പിണറായിയേയും സി പി എമ്മിനെയും, സിപിഐ പത്തനംതിട്ട ജില്ലാ സമ്മേളനത്തിൽ അടിമുടി വിമർശിച്ചിരിക്കുകയാണ്.

മുഖ്യമന്ത്രിയുടെ ഓഫീസുമായി ബന്ധപ്പെട്ട് ഉയര്‍ന്ന വിവാദങ്ങള്‍ സര്‍ക്കാരിന്റെ പ്രതിച്ഛായ്ക്ക് മങ്ങലേല്‍പ്പിച്ചെന്ന് ജില്ലാ സമ്മേളനത്തില്‍ അവതരിപ്പിച്ച രാഷ്ട്രീയ റിപ്പോര്‍ട്ടില്‍ വിമർശിക്കുന്നു. കറുത്ത മാസ്‌കിനോട് പോലും അസഹിഷ്ണുത കാണിക്കുന്നത് ജനാധിപത്യമല്ല. സിപിഐയ്ക്ക് പലയിടത്തും ഘടകകക്ഷിയാണെന്ന പരിഗണന പോലും ലഭിക്കുന്നില്ല.

എഐഎസ്എഫിനോട് എസ്എഫ്‌ഐ ഫാസിസ്റ്റ് നിലപാടെടുക്കുന്നു – സംസ്ഥാന കമ്മിറ്റി അംഗം മല്ലപ്പള്ളി തോമസ് അവതരിപ്പിച്ച രാഷ്ട്രീയ റിപ്പോര്‍ട്ടില്‍ വിമർശിക്കുന്നു. 42 വാഹനങ്ങളുടെ അകമ്പടിയോടെ സഞ്ചരിക്കുന്ന മുഖ്യമന്ത്രി പിണറായി വിജയന്‍ ഇടതുപക്ഷത്തിന്റെ മുഖമല്ല. അച്യുതമോനോനും നായനാര്‍ക്കും വിഎസിനും ഇല്ലാത്ത ആര്‍ഭാടമാണ് പിണറായി വിജയനാണ് ഇന്നുള്ളത്. എല്‍ഡിഎഫ് സര്‍ക്കാരിനെ ‘പിണറായി സര്‍ക്കാര്‍’ എന്ന് ബ്രാന്‍ഡ് ചെയ്യാന്‍ സിപിഎം ബോധപൂര്‍വം ശ്രമിക്കുന്നുവെന്നും പൊലീസിനെ നിലയ്ക്ക് നിര്‍ത്താന്‍ കഴിയുന്നില്ലെന്നും വിമര്‍ശനമുയര്‍ന്നു. തിരുവനന്തപുരം ജില്ലാ സമ്മേളനത്തിലും മുഖ്യമന്ത്രിക്ക് എതിരെ സമ്മേളന പ്രതിനിധികള്‍ രൂക്ഷ വിമര്‍ശനം നടത്തിയിരുന്നു.