സിനിമയിൽ ചാൻസ് വാഗ്ദാനം ചെയ്ത് 17കാരിയെ സംവിധായകൻ കാറിൽ തട്ടിക്കൊണ്ടുപോയി

സിനിമയിൽ ചാൻസ് വാഗ്ദാനം ചെയ്ത് പ്രലോഭിപ്പിച്ച് 17കാരിയെ കാറിൽ തട്ടിക്കൊണ്ടുപോയ കേസിൽ ബൈനറി എന്ന സിനിമയുടെ സംവിധായകനും സുഹൃത്തും പിടിയിൽ. സംവിധായകൻ കുറുവങ്ങാട് കേളമ്പത്ത് ജാസിക് അലി (36), സുഹൃത്ത് എരഞ്ഞിക്കൽ മണ്ണാർക്കണ്ടി അൽ ഇർഫാത്തിൽ ഷംനാദ് (33) എന്നിവരാണ് അറസ്റ്റിലായത്. ബൈനറി എന്ന സിനിമയുടെ സംവിധായകനാണ് ജാസിക് അലി.

കുറവങ്ങാട് സ്വദേശിനിയായ പതിനേഴുകാരിയെ സംവിധായകനും സുഹൃത്തും ചേർന്ന് തട്ടിക്കൊണ്ടുപോയി മൈസൂർ ബംഗളുരു എന്നിവിടങ്ങളിൽ താമസിപ്പിച്ച് പീഡനത്തിന് ഇരയാക്കിയതായ വിവരമാണ് പുറത്ത് വന്നിരിക്കുന്നത്. സിനിമയില്‍ അഭിനയിപ്പിക്കാമെന്ന് പറഞ്ഞ് പ്രലോഭിപ്പിച്ചാണ് പെണ്‍കുട്ടിയെ തട്ടിക്കൊണ്ടുപോയതെന്ന് ബന്ധുക്കള്‍ നല്‍കിയ പരാതിയില്‍ പറയുന്നു. തുടർന്ന് നടത്തിയ അന്വേഷണത്തിൽ കർണാടകയിലെ മടിവാളയിൽ വച്ച് ഇവർ പിടിയിലായി.

കൊയിലാണ്ടി സിഐ എൻ.സുനിൽകുമാറിന്റെ നേതൃത്വത്തിൽ സൈബർ സെല്ലിന്റെ സഹായത്തോടെ നടത്തിയ വിദഗ്ധ അന്വേഷണത്തിലാണ് പ്രതികൾ കുടുങ്ങുന്നത്. മൂവരും ഗുണ്ടൽപേട്ടയിലുണ്ടെന്ന് വിവരം ലഭിച്ചതിനെ തുടർന്ന് പൊലീസ് അവിടെയെത്തിയപ്പോൾ കടന്നുകളയുകയായിരുന്നു.

ഹോട്ടലിലെ സിസിടിവി പരിശോധിച്ച് എത്തിയത് അവർ തന്നെയെന്ന് ഉറപ്പുവരുത്തിയ ശേഷം നടത്തിയ അന്വേഷണത്തിൽ ഇവർ മൈസൂരുവിലേക്കും അവിടെനിന്ന് ബെംഗളൂരുവിലേക്കും കടന്നതായി കണ്ടെത്തി. കാർ ഡ്രൈവറുടെ മൊബൈൽ നമ്പർ കേന്ദ്രീകരിച്ച് നടത്തിയ അന്വേഷണത്തിലാണ് മൂവരെയും കണ്ടെത്താനായത്.